Inzozi za Queen D w’imyaka 16 ufite umwihariko w’imbyino mu muziki yise ‘Zoloma’

Amazina ye ni Agasaro Queen Daniella ariko mu muziki akaba akoresha izina rya Queen D. Uyu mukobwa uri mu bashya mu muziki Nyarwanda yasohoye indirimbo nshya yise “Zoloma” avuga ko umwihariko we ari uko harimo imbyino yahimbye yitiriye niryo zina ry’indirimbo.

Ni umukobwa w’imyaka 16 akaba yiga mu mashuri yisumbuye mu mwaka wa kane ku kigo cya Kigali Christian school (KCS). Nk’abandi banyempano bose nawe si ukuririmba gusa kuko afite n’izindi mpano zirimo kuvuga imivugo, kwandika inkuru, gukina filime ndetse no kubyina.

Icyatumye afata icyemezo cyo kuza mu muziki kandi akiri muto ngo ni uko yakuze abikunda ndetse akajya anakurikirana ibiganiro byagiye bibimukundisha cyane.

Ati “Nakuze nkunda kureba abaririmbyi n’ibiganiro by’abahanzi nyuma nanjye biza kuntera imbaraga numva ko natangira guhimba nkagira icyo ngeraho mu buhanzi ngira Imana ababyeyi barabinyemerera bakajya banamfasha mpita mbitangira uko.”

Mu Rwanda usanga abakobwa bakora umuziki wo mu njyana ya Dance Hall ari bake kuko bisaba imbaraga kuko yiganzamo cyane n’imbyino. Queen D we niho hamuryoheye.

Ati “Nkunda ibintu byo kubyina cyane kuza mu muziki nashatse kuzana umwihariko mu ndirimbo zanjye cyane ibyo kubyina kuko hari n’abandi bahanzi babikora cyane nk’abazanye za Pilolo, shaku shaku gwara gwara n’izindi.”

Mu ndirimbo ye nshya yise “Zoloma” nayo irabyinitse ikaba inarimo uwo mwihariko w’imbyino ye ari nawo yitiriye izina ry’indirimbo.

Ati “Nifuza ko ahantu hose bazajya bayibyina bazajya bamenyako ari Zoloma Dance.”

Umuntu wese mu kazi akora aba afite intego yaho yifuza kugera Queen we ngo yifuza kumenyekana ku rwego rw’Isi ku buryo azazamura ibendera ry’u Rwanda mu bihugu binyuranye.

Nk’umuhanzi ukizamuka arasaba umufasha bwo kumuba hafi kuko usanga aricyo kintu kibagora cyane.

Ati “Akenshi imbogamizi mbona umahanzi ashobora guhura nazo ni ukubura abagushyigikira kuko biba bigoye cyane kugera ahantu kure mu byo ukora udafite abantu bagufasha cyangwa bakunda ibyo ukora.”


Queen D ngo afite umwihariko w’imbyino yise Zoloma

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO