Iran yasubije inkingo za covid-19 yahawe nk’inkunga kuko zakorewe muri Amerika

Igihugu cya Iran gisanzwe cyidacana uwaka na Leta zunze ubumwe za Amerika cyamaze gusubiza inkingo za covid-19 zisaga 820,000 cyahawe nk’inkunga kuko zakorewe muri Amerika.

Amakuru dukesha Associated Press avuga ko izi nkingo Iran yazihawe nk’inkunga zivuye mu gihugu cya Poland zikaba ziganjemo izo mu bwoko bwa AstraZeneca.

Umuvugizi wa minisiteri y’ubuzima muri Iran Mohammad Hashemi, ubwo yasobanuraga ibyo gusubiza izi nkingo kuko zakorewe muri Amerika, yagize ati :" Igihe izi nkingo zageraga muri Iran, twasanze 820,000 muri zo zaravuye muri Poland ziturutse muri Amerika."

Umuyobozi w’ikirenga wa Iran, Ayatollah Ali Khamenei mu mwaka wa 2020 yatangaje ko inkingo za covid-19 zakorewe mu Bwongereza no muri Amerika zitemewe gukoreshwa muri iki gihugu.

Kuva icyo gihe Iran ikoresha inkingo zirimo Sputnik V yakozwe n’Uburusiya, Bharat’s Covaxin yakozwe n’Ubuhinde n’urukingo rwa COVIran rwakorewe imbere mu gihugu cya Iran.

Imibare yakozwe na Kaminuza ya Johns Hopkins ivuga ko kuva icyorezo cya Covid-19 cyagera ku isi, muri Iran hamaze kugaragara ubwandu bwa covid-19 ku bantu basaga miliyoni 7 mu gihe iki cyorezo cyahitanye abasaga 135,000.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO