Isimbi Alliance yagarutse I Kigali yakirwa n’abafana benshi (Amafoto)

Umukinnyi wa Filime Isimbi alliance uzwi nka Alliah Cool nyuma y’igihe gito ashyizwe mu ihuriro ry’abambasaderi b’umuryango w’abibumbye mu ishami rishinzwe amahoro irizwi nka International Association Of World Peace Advocats yagarutse I Kigali akubutse I Lagos Muri Nijeriya .

Uyu mukobwa umaze kwigarurira imitima ya benshi yageze ku kibuga cy’Indege cya Kigali mu ijoro ryo kuri uyu wa Mbere tariki ya 28 Gashyantare 2022 maze yakirwa n’abantu benshi barimo n’Umubyeyi we.

Abanyamakuru Egidie Bibio na Anita Pendo , abakinnyi ba Filime Benimana Ramadhan wamamaye nka Bamenya n’abandi benshi babukereye ngo bamuhe ikaze.

Akigera aho ku kibuga cy’indege, Alliance yatunguwe n’isinzi ry’abakunzi bari benshi bambaye imipira iriho ifoto ye ndetse yanditseho amagambo amuha ikaze mu Rw’Imisozi igihumbi.

Alliance mbere yo kuganira n’itangazamakuru yabanje kwisegura avuga ko bigoye kuganiriza itangazamakuru kuko byari bimutunguye Atari azi ko rihari ariko arihangana n’ikiniga cyinshi ararivugisha.

Mu magambo ye n’amarira y’ibyishimo, yagaragaje ko atari yiteze abantu benshi bamwakiriye barimo abafana be bari bitwaje ibyapa, bambaye imipira yanditseho amazina ye bamuha ikaze, bitwaje indabo n’ibindi.

Yavuze ko yagizwe Ambasaderi w’amahoro mu muryango w’abibumbye kubera imyidagaduro, sinema no kuba u Rwanda ari igihugu giha umwari n’umutegarugori ijambo umuntu akitinyuka akaba abasha kugera ku bintu bikomeye.

Yakomeje avuga ko kugirwa Ambasaderi w’amahoro mu muryango w’abibumbye byaturutse kuri filime ye ‘Alliah The Movie’ yamurikiye muri Nijeriya bwa mbere.

Ati “Byaturutse kuri filime yanjye ‘Alliah the movie’ namurikiye abantu Abuja. Bamaze kuyireba nganiriza abantu mbabwira aho u Rwanda rwavuye nyuma ya Jenoside n’ahantu twifuza ko rugera bityo bumva ko ari byiza kuba bampa ubwo burenganzira bwo kugarura amahoro ku Isi. Kuba Ambasaderi w’amahoro ku Isi.”

Yavuze ko inshingano ze harimo kujya mu bikorwa bivuga ku mahoro, na we akabisangiza abandi no guhagararira Umuryango w’abibumbye mu bikorwa byose yakwiyambazwamo.

Isimbi yahoranye inzozi zo kugira uruhare mu buzima bw’umwari n’umutegarugori, Avuga ko kuba ari Ambasaderi byamuciriye inzira yo kugira uruhare mu guhindura imibereho yabo.

Ati “Nahoze numva nagira uruhare nshyira mu buzima bw’umwari n’umutegarugori uri hasi. Nkimara guhabwa uyu mwanya nahise numva ari nzozi zanjye zibaye impamo bitari ku mwari n’umutegarugori gusa, ahubwo no ku bandi bantu basanzwe kandi ku isi hose.”

Yavuze ko nta manda ba Ambasaderi b’amahoro mu muryango w’abibumbye bagira kandi azakorana n’Abanyarwanda mu kuzuza neza inshingano yahawe.

Isimbi avuga ko izi nshingano yahawe zitazatuma areka gukina filime.

Ku wa 11 Gashyantare 2022, nibwo Alliah Cool ubarizwa mu kigo cy’Abanya-Nijeriya, One Percent International MGT, yatangajwe muri ba Ambasaderi b’Umuryango w’Abibumbye bashinzwe kugarura amahoro ku Isi [UN eminent peace ambassador].

AMAFOTO : NSANZABERA Jean Paul

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO