Isurwa ry’ingoro ndangamurage z’u Rwanda ryabaye rihagaritswe

Ubuyobozi bw’ikigo cy’ingoro z’igihugu z’umurage w’u Rwanda, cyashyize hanze itangazo rimenyesha abakigana bose ko uhereye kuri uyu wa kabiri tariki 17 Werurwe 2020, ingoro z’umurage w’igihugu zose zifunga imiryango by’agateganyo.

Ubuyobozi buvuga ko ari muri gahunda yo kwirinda ikwirakwizwa ry’icyorezo cya COVID-19. Igihe cyo kongera gufungura izi ngoro kikazamenyeshwa mu rindi tangazo.

Ingoro ndangamurage zashyizweho mu gusigasira amateka n’umuco by’igihugu no gufasha abazakomoka ku bariho kuyigiraho. U Rwanda rufite ingoro umunani zibumbatiye umurage n’amateka ku mibereho y’abarutuye, imyemerere, imibereho gakondo, imyidagaduro, imyambarire, imiziro n’imiziririzo, amateka y’abami, ubukoloni n’ibindi.

Ku wa Gatandatu tariki ya 14 Werurwe 2020 nibwo minisiteri y’ubuzima mu Rwanda yemeje ko Umuhinde wageze mu Rwanda ku wa 8 Werurwe 2020 avuye i Mumbai, yatahuweho icyorezo cya Coronavirus.

Kugeza ubu iyi minisiteri ivuga ko hamaze kubarurwa abarwayi barindwi bagaragaweho Coronavirus ku butaka bw’u Rwanda. U Rwanda rwafashe ingamba zitandukanye zirimo n’izigomba kumara nibura ibyumweru bibiri [bishobora kongerwa] mu kwirinda ikwirakwira rya Coronavirus.

Minisiteri y’Ubuzima yasabye abaturarwanda gukomeza gukurikiza amabwiriza atangwa n’ubuyobozi bw’urwego rw’ubuzima cyane cyane gukaraba intoki igihe cyose, kutajya ahantu hahurira abantu benshi no kumenyesha inzego zibishinzwe igihe ibimenyetso by’iyo ndwara byagaragaye hakoreshejwe umurongo wa telefoni itishyurwa 114 cyangwa bakabimenyesha umujyanama w’ubuzima.

Ibigo byinshi bya Leta byamaze gushyira amatangazo hanze agaragaza ko serivisi nyinshi zabyo zizajya zitangwa hifashishijwe ikoranabuhanga mu kwirinda ko abantu bakomeza guhura bishobora no kuvamo kwanduzanya.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO