Itsinda rya The Same basohoye indirimbo nshya bise ‘No Stress’ ireba cyane urubyiruko

Itsinda rya The Same Abiru ni rimwe mu asigaye mu Rwanda amaze igihe kinini mu muziki, rigizwe n’abasore babiri Imanizabayo JMV uzwi nka Jay Fary na Munyagisenyi Serge uzwi nka Jay Luv ryamenyekanye mu myaka ya 2010. Kuri ubu aba basore bashyize hanze amashusho y’indirimbo yabo nshya bise No Stress.

Nyuma yo gushyira hanze iyo ndirimbo Genesisbizz yagiranye ikiganiro n’umwe muribo uzwi nka Jay Luv atubwira byinshi ku muziki wabo muri ibi bihe bya COVID-19 ndetse no kuri iyo ndirimbo.

Yagize ati "Indirimbo No Stress twayikoze nyuma y’igihe kirekire tureba ibintu bibera mu buzima bwo hanze cyane mu bijyane n’urukundo, higanjemo kubeshya no kuryaryana, twaje gusanga tutabivamo duhitamo gukora iyo ndirimbo, tuyita No Stress kuko twabonaga bimaze kurenga cyane, tukaba twarayikoze dusaba abakunzi babo aho kugira ngo babeho mu buzima bwo kubeshyana babyihorera bakajya bibanira nk’abavandimwe ndetse bakarushaho ugirana inama, yewe bakaba banasohokana mu gihe cy’ibyishimo."

Tumubajije ku ruhande rwa muzika ya The Same Abiru muri iki gihe cya COVID-19 yatubwiye ko bitari ibihe byoroshye kuko yashegesheshe ibintu byinshi nabo itabasize kuko umuziki uri mu bintu byafunze kugeza na n’ubu bikaba bitarakomorerwa.

Gusa yashimangiye ko nubwo Coronavirus yangije byinshi yatumye benshi mu bantu cyane abahanzi Nyarwanda bakura mu mitekerereze bamenya ko bagomba gukora bizigama kandi bagakora umuziki winjiza amafaranga aho gukora umuziki wo kwishimisha gusa.

ibi akaba yarabivugiye ko ubu buri muhanzi asigaye arwanira gukora igihangano cyiza kugira ngo abakunzi be barusheho kugikunda, kandi kimwinjirize kabone y’uko noneho nta bitaramo bikibaho hasigaye hari imbuga nkoranyambaga abahanzi bashobora kugurishirizaho ibihangano, byabo bakabona agatubutse.

Ku ruhande rw’abakunzi ba muziki nyarwanda muri rusange aba The Same babasabye gukomeza kubahiriza amabwiriza yo kwirinda iki cyorezo, no gukomeza kubaba hafi kuko nabo badateze kuzabatenguha nk’andi matsinda yagiye akundwa mu Rwanda bikarangira atandukanye.

The Same Abiru bamenyekanye mu ndirimbo nka "Dede, Yumvirize, Rwuzuye, Mbiguyemo bakoranye na Amag The Black, Ikibibi,Tell me bakoranye na Bull Dogg" n’izindi nyinshi.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO