Iyi ni itsinzi y’u Rwanda - Umunyana Shanitah nyuma yo kwegukana ikamba rya Miss East Africa

Umunyana Shanitah wari uhagarariye u Rwanda mu irushanwa ry’ubwiza rya Miss East Africa 2021 ryabaga ku nshuro ya mbere niwe waryegukanye.

Miss Umunyana yambitswe ikamba kuri uyu wa 25 Ukuboza 2021, nyuma yo gutoranywa mu bakobwa 12 bari bahagarariye ibihugu birimo u Burundi, Tanzania, Uganda, Kenya, Ibirwa bya Comores, Ethiopie, Sudani y’Epfo n’ibindi.

Aba bakobwa bari bamaze ukwezi mu mwiherero bahabwa amahugurwa atandukanye, uyu munsi bakaba berekanye bimwe mu byo bize birimo kugenda neza, kwerekana umuco w’ibihugu byabo ndetse no kuvugira mu ruhame.

Mu myiyereko bakoze harimo ko buri wese yaserutse mu mwambaro gakondo w’igihugu cye ndetse bagera no mu gice cyo kwerekana impano aho Miss Umunyana Shanitah yabyinne amaraba.

Igisonga cya kabiri cya Miss East Africa cyabaye Oceanne Rose ukomoka muri Île Maurice, igisonga cya mbere yagizwe Queen Mugesi wari uhagarariye Tanzania.

Akanama Nkemurampaka kari kayoboye na Paul Siniga uzwi nka Rio Paul karimo na Miss Mutesi Jolly na Miss Lindah.
Nyuma yo kwegukana iri kamba Shanitah aganira na Wasafi Tv.

Yagize ati "Iyi ni itsinzi y’u Rwanda igihugu cyanjye ndetse n’abakobwa bagenzi banjye twari kumwe mu irushanwa. Mfite umushinga wo gushishikariza abakobwa kujya mu guhanga udushya ni cyo kintu cya mbere ngiye gukora.”

Miss Umunyana Shanitah yahembwe imodoka yo mu bwoko bwa Nissan Xtrail 2021 nshyashya igura ibihumbi 44 $, angana na miliyoni 44 Frw. Uretse iyi modoka azajya ahabwa umushahara wa 1500 $, arenga 1.500.000 Frw buri kwezi

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO