Jado Castar yakatiwe gufungwa imyaka ibiri, ntibyavugwaho rumwe

Urukiko Rwisumbuye rwa Gasabo rwakatiye Visi Perezida wa Kabiri ushinzwe Amarushanwa mu Ishyirahamwe Nyarwanda ry’Umukino wa Volleyball (FRVB), Bagirishya Jean de Dieu uzwi nka ‘Jado Castar’ igifungo cy’imyaka ibiri

Jado Castar unafatwa nk’umwe mu banyamakuru b’imikino bakomeye mu Rwanda yahawe iki gihano nyuma yo guhamwa n’icyaha cyo gukoresha inyandiko mpimbano.

Ku wa gatanu tariki 8 Ukwakira 2021 nibwo Jado Castar yagejejwe imbere y’urukiko aburana ku cyaha yaregwaga, icyo gihe yaburanye yemera icyaha, ndetse asaba no kugabanyirizwa ibihano.

Uyu munsi tariki 13 Ukwakira nibwo hagombaga gusomwa umwanzuro ku byaha Castar yashinjwaga, ku isaha ya saa tanu nibwo urukiko rwa Gasabo rwanzuye ko Bagirishya Jean de Dieu akatirwa imyaka ibiri y’igifungo.

Benshi ku mbugankoranyambaga higanjemo abanyamakuru bagenzi be bashenguwe ndetse banagaragaza ko batanyuzwe n’igihano cyahawe Jado Castar. Bose bagahuriza ku ngingo y’uko Jado Castar ibyo yakoze yabikoraga mu nyungu rusange.

Umunyamakuru bakorana ndetse banamaranye igihe Jean Luc Imfurayacu yagize ati: “Witangiye Sport uko wari ushoboye, nizera ko uzanakomeza. Udakosa ni udakora. Ikintu cyose kigira impamvu, Courage Reka Turebe ko hari ikindi Kizavamo. Ni ibihe bikomeye, ariko abagabo niko bigenda baberaho kurenga ibihe bigoye. Courage Gr Frè, Imana ibane nawe!”

Osward Oswakim umunyamakuru wa RadioTv10 nawe yagize ati: "Iyo se basi akatirwa igifungo gisubitse?!! Cg igihano nsimburagifungo Ndatekereza ko atari agambiriye kugirira nabi urwamubyaye. Ndizera ko hakiri andi mahirwe y’uko iki cyemezo cyasubirwamo. Komera komera confrère!"

Castar yatawe muri yombi ku wa 20 Nzeri 2021, akurikiranyweho ibyaha bifitanye isano n’iperereza riri gukorwa rijyanye n’icyatumye Ikipe y’Igihugu mu Bagore isezererwa muri Shampiyona Nyafurika ya Volleyball yabereye mu Mujyi wa Kigali mu kwezi gushize.

Ikipe y’Igihugu y’u Rwanda y’Abagore yasezerewe mu Gikombe cya Afurika cya Volleyball cyabereye i Kigali hagati ya tariki ya 10 n’iya 20 Nzeri 2021, ishinjwa gukinisha abakinnyi bakomoka muri Brésil batujuje ibisabwa.

Iri rushanwa ryasojwe ku wa 19 Nzeri 2021, ryegukanywe na Cameroun nyuma y’iminsi ibiri ridakinwa kubera kutumvikana ku cyemezo cyari gufatirwa u Rwanda.

Aline Siqueira, Apolinario Caroline Taiana, Mariana Da Silva na Moreira Bianca Gomes bakomoka muri Brésil, bakiniye u Rwanda ku nshuro ya mbere nyuma yo kugera i Kigali muri Kanama uyu mwaka, ni bo bagaragajwe nk’abakinnyi batujuje ibisabwa mbere y’umukino rwari rugiye guhuramo na Sénégal ku wa 16 Nzeri 2021.

Ibi byatumye hafatwa umwanzuro w’uko irushanwa risozwa hatarimo ikipe y’u Rwanda kuko yahise isezererwa.

Ubutumwa bwa Oswakim
Ubutumwa bwa Gicumbi

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO