Kalonda aratabariza abahanzi bakeneye gufashwa muri ibi bihe bigoye

Jean Pierre Kalonda umwe mu basanzwe bafasha abahanzi benshi bakomeye mu Rwanda, aratabariza abahanzi batari gukora muri iki gihe cya gahunda ya guma mu rugo igikomeje ku bakora imirimo ihuza abantu benshi harimo n’abahanzi.

Jean Pierre Kalonda uzwi ku mazina ya ‘Jipe Kalonda’ wahoze areberera ibikorwa bibyara inyungu z’abahanzi banyuranye barimo Jean Paul Samputu, Maréchal De Gaulle, wamenyekanye muri Orchestre Ingeri usigaye utuye muri Canada n’abandi barimo ndetse na Mihigo François Chouchou, aratabariza abagira neza bose aho bari kugira ngo bafashe abahanzi ba muzika Nyarwanda muri ibi bihe bya guma mu rugo.

Genesisbizz iganira na Jipe Kalonda yagize ati: “Abo dushaka kwibandaho cyane ni abacuranzi basanzwe bagaragara inyuma y’abahanzi kandi ntibamenywe na benshi bityo bakaba aribo bagaragara nk’abamerewe nabi cyane kurusha abandi mu muziki Nyarwanda .”

Jipe Kalonda akomeza avuga uretse uburyo busanzweho bwo gufasha unyuze kuri GoFundMe aho umuntu ashobora gufasha yifashishije VisaCard cyangwa se MasterCard, ababyifuza banakora ibyo bikorwa byo gufasha bigerera kuri abo bacuranzi mu gihe hari abo baziranye.

Kalonda Jean Piere wateguye iki gikorwa cyo gufasha yemeza ko yabanje kuganira n’urwego rukuriye aba bahanzi mu Rwanda kugira ngo hareberwe hamwe abashobora gufashwa kurusha abandi ndetse uru rwego rukaba rwaranishimiye iki gikorwa.

Iki gikorwa cyo gufasha cyatangiye kuwa 20 Mata uyu mwaka, aho abahanzi Nyarwanda bafashwa binyuze ku rubuga rwa GoFund Me rumaze kugera kuma Euro 300 angana n’ibihumbi 301 n’amafaranga 618 y’U Rwanda, aho byibuze iki gikorwa gifite intego yo kugeza kuma Euro 5000.

Bikorwa bite?

Umuntu wese ushoboye gufasha, yabikora yifashishije VisaCard ndetse na MasterCard ubundi agakanda hano kuri https://www.gofundme.com/f/aide-aux-musiciens-du-rwanda?utm_source=whatsapp&utm_medium=chat&utm_campaign=p_cf+share-flow-1 ugahita ukanda ahanditse ‘Donate Now’
Uhita utungukira ahantu hameze gutya, ubundi ugakanda ’Donate now’

Jipe Kalonda ashima byimazeyo Jean Paul Samputu wamufashije gukora iki gikorwa ngo kigende neza, ndetse akanashimira abamaze kugira icyo batanga kugira ngo abahanzi babeho neza muri ibi bihe bitoroshye U Rwanda rurimo kwirinda icyorezo cya Coronavirusi.

Ibi bikorwa byiza byo gufasha abahanzi bije nyuma y’uko bamwe muri bo bakomeje kugaragaza ko hari abafite ibibazo byo kubaho n’imiryango yabo bitewe n’uko batakiri gukora ndetse bamwe muri bo bakanagira ipfunwe ryo kujya gufata ibyo kurya bitangwa na leta ku bagizweho ingaruka n’iki cyorezo

Ibikorwa bya Guma mu rugo bimaze kugira ingaruka ku bukungu bw’ibihugu byinshi byo ku isi birimo n’U Rwanda, aho kugeza ubu hari abagihura n’ingaruka z’icyorezo cya Coronavirusi cyatumye abantu badakora barimo abari batunzwe n’ibikorwa by’ubuhanzi, abanyamadini, abakinnyi, abarimu ndetse n’abandi.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO