Kayirebwa yafatikanyije Corona n’icyunamo mu ndirimbo nshya ntoya-Video

Umuhanzikazi ukunzwe cyane mu njyana gakondo hano mu Rwanda Cécile Kayirebwa yasohoye indirimbo ikangurira abantu kwirinda Coronavirusi yadufatanyije n’icyumweru cy’icyunamo.

Cécile Kayirebwa yamenyekanye cyane mu ndirimbo nka ‘None Twaza’ , ‘Rwanda’ , ‘Cyusa’ n’izindi nyinshi zagiye zikundwa cyane mu Rwanda ndetse no mu mahanga.

Kuri ubu Cécile Kayirebwa yateye indi ntambwe yo gutanga ubutumwa bukangurira abantu kwirinda Virusi ihangayikishije isi kugeza magingo aya ya COVID-19.

Mu mudiho ugizwe n’amashyi ye gusa ndetse n’ijwi rye, dore ko nta kindi gicurangisho cya muzika na kimwe kiri muri iyi ndirimbo, yahuje iki cyorezo cya Corona no kuba cyaradufatanyije n’icyunamo abanyarwanda baba bibuka Jenoside yakorewe abatutsi muri Mata 1994.

Iyi ndirimbo ifite umwihariko wo kuba ari ntoya cyane kuko ifite gusa umunota 1 n’amasegonda 25, aho amashusho yayo aba agaragaza Kayirebwa akaraba intoki.

Kayirebwa yagize ati: “Bakunzi banjye, nshuti zanjye,Turwanye Coronavirus hose n’gihe cyose, mu migi no mu byaro. Dukarabe ibiganza kenshi ku munsi n’amazi meza n’isabune. Tugume mu rugo, twirinde kwegerana habe no kuramukanya. Ahari abantu bandi dushyiremo metero imwe hagati yacu nibura.”

Iyi ndirimbo irimo amagambo agira ati: “Oya sigaho Corona kudufatanya n’icyunamo… Uramenye Corona…iyandurure Corona, usubire iyo wavuye… oya simvuga Ubushinwa, ndavuga iyo gihera, kiguherane nawe ugende uzagwe ku gasi kure y’abana b’imana… twunamire abacu bazize jenoside…”

Cécile Kayirebwa asanzwe ari umwe mu bahanzi ntashidikanywaho ko bakomeye mu Rwanda bitewe n’umwimerere ndetse n’ubuhanga buba mu myandikire n’injyana z’indirimbo ze.

Cécile Kayirebwa ukiri kubarizwa mu Rwanda kuri ubu, yaraherutse kubimburira abandi bahanzi bose babayeho mu Rwanda kuzitabira igitaramo yagombaga gushimirwamo nk’umuhanzi w’ikirenga mu bahanzi bose bahari ku nshuro yacyo ya mbere mu Rwanda.

Iki gitaramo cyaje guhurirana n’ikwirakwira rya Coronavirusi, biza gutuma gihagarikwa ku munota wa nyuma mu rwego rwo kwirinda ikwirakwira ry’iyi virusi binyuze mu kwegerana kwahateraniye abantu benshi.

Gusa ubuyobozi bwa Bwiza Media na Karibu ASBL n’abandi bari bateguye iki gitaramo bahise batangaza ko abafite amatike bayabika kugeza ibi bihe bisoje kugira ngo nibishoboka kizasubukurwe.

Reba indirimbo nshya ya Cécile Kayirebwa yise ‘Ndagukarabye Corona, Subira iyo wavuye’:

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO