Kidum yaciye amarenga yo kongera gutaramira mu Rwanda

Muri Nzeri umwaka ushize nibwo Kidum yiseguye ku bakunzi ba muzika ye bo mu Rwanda, ubwo yatangazaga ko atakitabiriye igitaramo cya Kigali Jazz Junction, ndetse ko atari azi niba azongera gutaramira mu Rwanda, kuri ubu .

Jean Pierre Nimbona uzwi cyane ku izina ry’ubuhanzi rya Kidum Kibido ukunzwe n’abatari bacye muri aka karere ka Afurika y’Iburasirazuba, yari yaratsimbaraye ku cyemezo cy’uko atari kuzagaruka gutaramira mu Rwanda ndetse no mu Burundi.

Umwaka ushize Kidum yanyujije ubutumwa bugufi ku mbuga nkoranyambaga ze aho yagiraga ati: “Niseguye ku bakunzi banjye b’i Kigali kuba ntazitabira igitaramo kiri muri uku kwezi ndetse sinizeye neza ko nzabasha kwitabira no mu bindi biri imbere."

Yakomeje agira ati "Ni ku mpamvu ntamenye mbere zirimo kuba hari ibyo ntujuje. Nshimiye abategura ibitaramo badahwema kuntekerezaho, nsabiye umugisha uva ku Mana abakunzi bange na Afurika muri rusange.”

Aya magambo yagaragazaga ugushidikanya gukomeye ku kuba yakongera gutaramira mu Rwanda, ibintu bitavuzweho rumwe haba mu Rwanda no mu Burundi, ariko ku ruhande rwe akabyita ‘impamvu zirimo ibyo atujuje nawe atabashije kumenya’.

Kidum yabwiye BBC dukesha iyi nkuru ko abantu bakunda kwitiranya ingendo akorera I Kigali n’I Bujumbura mu bikorwa by’umuziki na politike.

Ibi nibyo bisa n’ibyacaga amarenga ko Kidum atazongera gukandagiza ikirenge mu bihugu by’u Rwanda n’u Burundi.

Nimbona Jean pierre yemeza ko ajya gufata iki cyemezo kwari ukugira ngo afate akanya yihe amahoro.

Nyuma yo kuvuga atya, yasubiye ku mbuga nkoranyambaga asaba imbabazi igihugu cye, avuga ko agiye kongera gutaramira ku ivuko (I Burundi) n’ubwo yari yaravuze ko atazahasubira.

Kidum yemeje ko agiye yisubiyeho ku mwanzuro we wo kutazongera gutaramira I Burundi no mu Rwanda

Aya magambo ya Kidum yabwiye BBC, araca amarenga ko nta kabuza no mu Rwanda ashobora kuzagaruka kuhataramira, nyuma y’uko wenda amahoro yashakaga ahagarika gutaramira i Kigali wenda yayabonye.

Kidum Kibido ubwo yaherukaga i Kigali hari indirimbo yasize akoranye na Marina Debol bise ‘Mbwira’.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO