King James yamuritse urubuga rushya ati “Ndifuza kuzabona umuhanzi yahakuye Inzu”

Umuhanzi King James yamuritse urubuga rushya ruzajya rufasha ababarizwa mu myidagaduro gucuruza ibikorwa byabo atangirira kuri Album ye nshya yise ‘Ubushobozi.’

Ni urubuga yahaye izina rya Zana Talent, avuga ko ajya kurushinga igitekerezo cyavuye ku bahanzi bajya bamwandikira bamwaka ubufasha bwo kugirango bamenyekanishe impano zabo.

Uru rubuga yamurikiye itangazamakuru hariho ibyiciro bitandukanye aho buri muntu wese yafunguraho konte ye ubundi akajya acururizaho ibihangano bye agashyira no ku biciro yifuza.

Mu biriho harimo umuziki, filime, ibiganiro, urwenya hamwe n’imikino. Umuntu wese uzajya ashyiraho ibyo bikorwa bye azajya abanza yumvikane n’ababishinzwe kugirango bamuhe uburenganzira bwo kubikora anagene amafaranga yifuza bitewe nireme aha igihangano cye.

King James ati “Nkanjye nishyuje ibihumbi bitanu kuko ariyo nifuje gusa ntibikuyeho ko undi muhanzi atayajya hejuru cyangwa munsi bitewe n’agaciro aha ibikorwa bye.”

Akomeza avuga ko yifuza ko urwo rubuga rwafasha Abahanzi Nyarwanda ku buryo igihe runaka yazumva ngo hari umuhanzi wubatse inzu abikesha uru rubuga rwa Zana Talent.

Ku bantu bazajya bahagurira indirimbo n’abo yabamaze impungenge asobanura uburyo bazajya babikoramo.

Ati “Niba Album yanjye yose uyiguze ibihumbi bitanu uzajya wumva izo ndirimbo zose kandi ibihe byose, waba ufite internet cyangwa utayifite uzajya ujyaho wumve izo ndirimbo ariko ntabwo wemerewe kuba wazikuraho ngo uzishyire ahandi.”

Kuri Album ye ya karindwi yise ‘Ubushobozi’ izajya hanze taliki ya 12 Ukuboza 2021. Izaba iriho indirimbo 17, ziganjemo ize gusa kuko izo yakoranye n’abandi bahanzi nka ‘Israel Mbonyi, Ariel Wayz na Bull Dog.’

Aho wanyura ushaka kugura cyangwa gushyira igihangano cyawe kuri urwo rubuga: https://zanatalent.com/


King James yamuritse uru rubuga imbere y’itangazamakuru asaba abahanzi ko barugana

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO