Kiyovu Sports iciye impaka ku makuru ajyanye na ruswa yavugwaga ku mutoza wayo

Ku munsi w’ejo kuwa Gatatu tariki 11 Gicurasi, amakuru yakomeje kuba kimomo avuga ko umutoza mukuru wa Kiyovu Sports, Haringingo Francis yaba yatawe muri yombi na RIB, kubera gufatirwa mu cyuho ari kwakira ruswa.

Abakwirakwije ibi bihuha bavugaga ko ikipe ya APR FC ishobora kuba ari yo yaba yahaye uyu mutoza amafaranga angana na miliyoni 6 Frw kugirango azaregeze mu mukino wa shampiyona ikipe ya Kiyovu Sports ifitanye na APR FC ku italiki ya 14 Gicurasi.

Mu kiganiro Perezida wa Kiyovu Sports, Mvukiyehe Juvénal yahaye itangazamakuru,yahakanye aya makuru yivuye inyuma ndetse ahamya ko ubwo aya makuru yavugwaga aba bombi bari kumwe kandi bakomeje gutegura neza umukino ubaraje inshinga.

Ati “Ni ibinyoma nta kibazo gihari. N’ubu dutandukanye atashye,turi gutegura neza umukino w’umunsi wa 27 wa shampiyona. Twabonye bavuga ngo APR yamuhaye miliyoni 6 Frw barazimufatana, kandi twari kumwe.”

Ibi bihuha biri kuvugwa ni ibigamije kurangaza abakunzi ba Kiyovu Sports kugira ngo batentebuke ku rugamba rwo gushyigikira iyi kipe ishaka kongera gutwara shampiyona iheruka 1993.

Magingo aya ku rutonde rw’agateganyo rwa shampiyona,ikipe ya APR FC iri ku mwanya wa Mbere n’amanota 60, mu gihe Kiyovu Sports ya Kabiri ifite amanota 57.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO