Guma mu rugo iravuza ubuhuha muri Koreya ya Ruguru kubera umurwayi umwe rukumbi wa COVID-19

Koreya ya Ruguru yatangaje ko kuva muri Mata uyu mwaka iki gihugu cyadutswemo na Coronavirus yihinduranyije ndetse bwa mbere habonetse umuntu wa mbere urwaye iki cyorezo kuri ubu butaka bw’iki gihugu bituma hatangizwa guma murugo mu gihugu hose.

Abategetsi b’icyo gihugu bavuga ko Coronavirus ya BA.2 yagaragaye bwa mbere mu baturage bo mu murwa mukuru Pyongyang, nyuma y’imyaka ibiri n’amezi ane bari bamaze barafunze imipaka icyo gihugu gisangiye n’u Bushinwa.

Ikinyamakuru cya Leta cyitwa Korean Central News Agency (KCNA), cyazindutse gitangaza kuri uyu wa Kane ko icyorezo cyageze muri icyo gihugu, ariko nta mibare y’abarwayi iratangazwa gusa ngo hari umuntu umwe wamaze kwandura iki cyorezo.

KCNA yagize iti “Hashyizweho ibihe bidasanzwe mu gihugu harimo no kujya mu kato, nk’uko byakoreshejwe kuva mu myaka ibiri n’amezi ane ashize guhera muri Gashyantare 2020”.

Leta ya Koreya ya Ruguru yari yafunze imipaka mu kwezi kwa Mutarama 2020 nyuma y’ukwezi kumwe havuzwe icyorezo Covid-19 bwa mbere mu gihugu gituranyi cy’u Bushinwa, ikavuga ko kuva icyo gihe nta muntu n’umwe wigeze agaragarwaho n’iyo virusi, n’ubwo abasesenguzi bagiye babikemanga.

Umwarimu muri Kaminuza ya Ewha iri i Seoul muri Koreya y’Epfo, Prof Leif-Eric Easley, avuga ko ingamba zashyizweho n’u Bushinwa zo gusubiza abaturage muri “Guma mu rugo” muri ibi bihe, Koreya ya Ruguru yo ngo igiye kuzikuba kabiri.

Prof Easley yagize ati “Koreya ya Ruguru yinjiye mu gihirahiro ku buryo na yo itazamenya uko icungana n’ibibazo byayo biri imbere mu gihugu ndetse n’ibyo hanze yatewe no kwishyira mu kato, iyi Leta ya Kim Jong Un yagombye gushyira hasi ibijyanye no kwiyemera ikemera guhabwa inkingo n’imiti”.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO