Ku myaka 28, Hakim Ziyech yasezeye mu ikipe y’igihugu ya Maroc

Hakim Ziyech ukinira ikipe ya Chelsea yasezeye mu ikipe y’igihugu ya Maroc nyuma yo kutajyana nayo mu gikombe cy’Afurika.

Nk’uko umutoza Vahid Halilhodzic abitangaza ngo Ziyech w’imyaka 28 y’amavuko ntabwo yigeze agaragara mu ikipe y’igihugu kuva muri Kamena 2021 nyuma yo kwanga gukinira iyi kipe.

Ziyech yatangaje ko atazongera gukinira Maroc mu kiganiro yagiranye n’abanyamakuru, aho ari kumwe n’ikipe ya Chelsea mu mikino y’igikombe cy’isi cy’amakipe (clubs) kiri kubera Abu Dhabi.

Yagize ati " Yego, nicyo cyemezo ntakuka nafashe. Byose namaze kubibona uko bigenda hariya, ubu ngubu nshishikajwe n’akazi kanjye mu ikipe yanjye.

"Nkuko nabivuze mbere ntabwo nzasubira mu ikipe y’igihugu. Ndabumva kandi banyihanganire.”

Muri Kamena 2021, Umutoza w’ikipe y’igihugu ya Maroc, yari yatangaje ko atishimiye imyitwarire ya Hakim Ziyech.

Yagize ati "Imyitwarire ye mu mikino ibiri ishize, cyane cyane uherutse, ntabwo yari iy’umukinnyi w’ikipe y’igihugu, nk’umukinnyi uyobora abandi mu ikipe agomba kuba intangarugero.

"Yahageze atinze, nyuma yaho, yanga no gukora. Nta mpamvu yo kubiganiraho nyuma, nk’umutoza igisubizo kirahari.

"Kuri njye, ikipe y’igihugu iri hejuru ya byose, nta muntu ushobora kuyifata uko yishakiye.

"Umukinnyi wanga gukina umukino yabwiye inshuti ye ko yavunitse. Ariko abaganga bagakora ibizamini inshuro nyinshi bakavuga ko ashobora gukina. Nyuma yanze kwishyushya mu gice cya kabiri kuko atari yishimiye kubanza hanze.

"Kuri njye, iyo myitwarire ntabwo nyemera. Ntushobora gukina n’ikipe y’igihugu. Urahari ijana ku ijana cyangwa ntuhari. Ntabwo nzabyihanganira."

Hakim Ziyech akaba asezeye mu ikipe y’igihugu ya Maroc nyuma yo kuyikinira imikino 41, akayitsindira ibitego 17.


Hakim Ziyech yasezeye mu ikipe y’igihugu ya Maroc

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO