Nari umugabo ntihabwa intebe FERWAFA yasobanuye iby’abakinnyi batahamagawe

Nyuma y’aho umutoza w’Amavubi yahamagaraga abakinnyi bazakina na Mozambique umukino w’amatsinda yo gushaka itike ya CAN ya 2023, Perezida wa FERWAFA yavuze ko abakinnyi batahamagawe batari mu gihano ahubwo Ko hatoranyijwe abashoboye.

Ku Cyicaro cy’ishyirahamwe ry’umupira w’amaguru mu Rwanda (FERWAFA) niho umutoza w’Amavubi yatangarije urutonde rw’abakinnyi 28 bazakora imyiteguro ya nyuma.

Mu bakinnyi batahamagawe barimo Niyonzima Olivier Sefu ukina hagati mu kibuga mu ikipe ya AS Kigali.

Mu Ugushyingo 2021, u Rwanda rwatsinzwe na Kenya ibitego 2-1 i Nairobi, umukino wakurikiwe no guhanwa kwa Niyonzima Olivier wari warenze ku mabwiriza.

Nyuma, Niyonzima yandikiye ubunyamabanga bwa FERWAFA asaba imbabazi ubuyobozi n’Abanyarwanda muri rusange. Gusa igisubizo yahawe nticyahise kimenyekana.

Perezida wa FERWAFA, Nizeyimana Olivier yavuze ko Niyonzima Olivier atazize ko yahanwe ahubwo ko hashize igihe yarahawe imbabazi.

Yagize ati “ Sefu (Niyonzima Olivier) yasabye imbabazi kandi yarazihawe. Kuba atarahamagawe ntabwo bimusubiza mu bihano.”

Nizeyimana akomeza avuga ko kudahamagarwa kwa Niyonzima Olivier ari ibisanzwe nk’uko hari n’abandi batahamagawe.

Yagize ati’’ Umukinnyi utarahamagawe ntabwo ari ibihano runaka arimo kuko umutoza mukuru ni we uhitamo abakinnyi, ntabwo FERWAFA ari yo ihamagara.

Mu rugendo rwo gushaka itike ya CAN ya 2023, u Rwanda ruzatangira ruhura na Mozambique tariki ya 2 Kamena 2022.

Mu mikino y’amatsinda yo gushaka itike ya CAN ya 2023, u Rwanda ruri mu itsinda rya 12 ririmo Sénégal ibitse igikombe, Bénin na Mozambique.

Kuri uyu wa Gatanu ni bwo Carlos Ferrer yahamagaye abakinnyi 28 bazatangira imyitozo ku wa 25 Gicurasi 2022 bitegura umukino uzahuza u Rwanda na Mozambique.

Umukino uzakinwa kuwa Kane tariki 2 Kamena 2022, ukabere kuri FNB Stadium muri Afurika y’Epfo mu gace ka Nasrec, mu Mujyi wa Johannesburg.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO