Liverpool ikomeje kurya isata burenge ikipe ya Manchester City ari nako Mohamed Salah akomeje gutsinda ubudasiba

Iyi kipe itozwa n’umutoza w’Umudage Jurgen Kloop ikomeje gushyira igitutu ku ikipe iyoboye urutonde rwa shampiyona. Ni nyuma yaho ikipe ya Manchester City itsinzwe mu mukino n’ikipe ya Tottenham ibitego 3-2.

Nyuma y’umukino ikipe ya Liverpool yari yakiriyemo ikipe ya Norwich ku kibuga cyayo cya Anfield igaturuka inyuma ikishyura igitego yari yatsinzwe igice cya kabiri kigitangira nyuma y’uko bari bagiye mu kiruhuko banganya ubusa ku busa.

Yakomeje kotsa igitutu ikipe ya Norwich City nyuma y’iminota itatu gusa nibwo Mohamed Salah yaje atsinda igitego cya kabiri nyuma y’igihe gito Sadio Mane yari amaze atsinze igitego cya mbere.

Icyo gitego Mohamed Salah yatsinze cyatumye ahita yuzuza ibitego 150 amaze gutsindira iyi kipe mu mikino 233 yakinnye.

Yahise aza ku mwanya wa kabiri mu mateka y’iyi kipe y’abamaze gutsinda ibitego byinshi mu gihe gito bayikiniye akurikiye umukinnyi wakiniye iyi kipe wari Umwongereza witwa Roger Hunt ni we wayitsindiye ibitego 226 mu gihe gito cyane.

Uyu mukinnyi kandi amaze gutsinda ibitego 25 mu mikino 30 yagaragayemo muri uyu mwaka w’imikino bikubiyemo ibitego 17 amaze yatsinze mu mikino 23 yose hamwe amaze kugaragaramo muri shampiyona ya Premier League.

Mu mukino iyi kipe ya Liverpool yatsinzemo Norwich yari yaruhukije abakinnyi benshi babanzamo cyane cyane abakina mu bwugarizi bwayo.

Muri bo harimo umukinnyi ukina ku ruhande rw’iburyo Trent Alexander- Arnold na Andy Robertson bari basimbuwe na Joe Gomez ndetse Konstantinos Tsimikas, Joel Matip nawe yari yamubanjemo mu mwanya Ibrahim Konate wari uherutse kwigaragaza neza mu mukino batsinzemo ikipe ya Inter de Milan yo mu Butaliyani muri Champions League.

Niko kandi yabikoze mu kibuga hagati aho yabanjemo Naby Keita na Alex Oxlade Chamberlain bafatanije na Kapiteni Jordan Henderson.

Ku busatirizi ho yakoze impinduka imwe gusa aho umukinnyi uherutse gusinyishwa n’iyi kipe imukuye mu ikipe ya Porto Luis Diaz yabanjemo asimbuye Diogo Jota wavunitse mu mukino uheruka.

Liverpool nyuma y’uwo mukino yakomeje kuba ku mwanya wa kabiri ikomeza gukurikira ikipe ya Manchester City iri ku mwanya wa mbere gusa byafashije ikipe ya Liverpool gukomeza kugabanya umubare w’amanota hagati yayo n’ikipe ya Manchester City yo yatakaje amanota y’uyu munsi iyabujijwe n’ikipe ya Tottenham.

Kugeza ubu ikinyuranyo cy’amanota hagati y’aya makipe ubu gisigaye ari amanota 6 gusa kuko ubu Manchester City irayoboye n’amanota 63, Liverpool ikayigwa mu ntege n’amanota 57 ku mwanya wa kabiri.

Iyi kipe ya Liverpool ihagaze neza kuko nk’ubu imaze imikino 8 yikurikiranya idatsindwa mu marushanwa yose muri rusange harimo 5 yo muri shampiyona yabo ya Premier League.

Umutoza wa Liverpool, Jurgen Kloop nyuma y’umukino yavuze ko ikibaraje ishinga ari uguha agaciro buri mukino wese bagiye gukina ko aribyo bifite agaciro.

Yagize ati: “guhangana n’ikipe ya City biragoye kuko yo buri mukino wose igenda ifite gahunda yo kuwutsinda, natwe tugomba kwita ku byacu tugatsinda tugategereza kureba uko uyu mwaka w’imikino uzarangira.”


Salah niwe mu kinnyi wa kabiri mu bamaze gutsindira ikipe ya Liverpool ibitego byinshi mu gihe gito

Salah nyuma yo kuba umukinnyi wa kabiri utsindiye ibitego byinshi Liverpool nyuma ya Roger Hunt yagize ati: “birashimishije cyane, Mpora nterwa ishema no gutsindira ikipe yanjye, igishimishije kuruta ibindi ni ugutsinda imikino nk’iyi y’uyu munsi.”

Ikipe ya Liverpool izakurikizaho imikino ibiri nyuma yo gutsinda uw’uyu munsi harimo uwo bazakirira ku kibuga cyabo Anfield ikipe ya Leeds United ku wa 23 Gashyantare bakurikizeho umukino ukomeye bazahuramo n’ikipe ya Chelsea ku mukino wa nyuma wa Carabao cup uzaba ku cyumweru tariki 27 Gashyantare 2022.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO