Lou Ottens wavumbuye cassette y’amajwi yapfuye ku myaka 94

Niba waravutse mu myaka iri mbere ya 2000 wumviye umuziki kuri cassette mbere y’uko haza ikitwa CD ndetse na Flash kuko niryo terambere ryari rihari, Lou Ottens, enjeniyeri w’Umuholandi ufatwa ko ari we wavumbuye cassette ifatirwaho amajwi, yapfuye afite imyaka 94.

Bigereranywa ko za cassette miliyari 100 zagurishijwe mu bice bitandukanye byo ku isi kuva zatangira gukoreshwa mu myaka ya 1960.

Ubu buvumbuzi bwa Ottens bwahinduye uburyo abantu bumvagamo umuziki, ndetse mu myaka ya vuba ishize habayeho kongera gukoreshwa kwa za cassette.

Uyu enjeniyeri yapfiriye mu mujyi yavukiyemo wa Duizel mu mpera y’icyumweru gishize, nkuko byatangajwe n’umuryango we ku wa kabiri.

Mu 1960, Ottens yabaye ukuriye ishami ryo gukora ibicuruzwa muri kompanyi y’ikoranabuhanga yo mu Buholandi, Philips, aho we n’itsinda rye bakoze cassette.

Mu 1963, iyo cassette yamuritswe mu imurikagurisha ry’ibikoresho by’ikoranabuhanga rya radio ryabereye i Berlin mu Budage, nyuma y’igihe gito ihita igurwa cyane ku isi.

Ottens yagiranye amasezerano na Philips na Sony yo mu Buyapani yatumye ubuvumbuzi bwe bwemezwa nka cassette yonyine yemewe n’amategeko.

Hari nyuma yuko kompanyi zo mu Buyapani ziganye iyo cassette ye zikayikoramo izindi bisa ziri mu ngano zitandukanye.

Mu 2013, ubwo yizihizaga imyaka 50 ubuvumbuzi bwe bwari bumaze, yabwiye ikinyamakuru Time ko bwari"butangaje"kuva ku munsi wa mbere.

Ottens yanagize uruhare mu ikorwa rya ’compact disk’ (CD), kandi kugeza ubu za CD zirenga miliyari 200 zimaze kugurishwa ku isi.

Mu 1982, ubwo kompanyi Philips yamurikaga akuma gakina CD (CD player), Ottens yagize ati: "Kuva ubu, akuma gasanzwe gafata amajwi kakanayavuza [record player] nta cyo kakimaze".

Imyaka ine nyuma yaho, yasezeye ku kazi ajya mu kiruhuko cy’izabukuru.
Ubwo yabazwaga ku kazi yakoze, yavuze ko ikintu cya mbere gikomeye yicuza ari uko Sony ari yo yakoze akuma kavuza cassette (cassette tape player) kamamaye ku isi kitwa Walkman, aho kuba ari Philips yagakoze.

Mu buryo butari bwitezwe, za cassette zongeye kwamamara mu myaka ya vuba aha ishize. Abahanzi barimo nka Lady Gaga n’itsinda The Killers basohoye imiziki yabo kuri za cassette.

Nkuko bitangazwa na kompanyi yo mu Bwongereza igenzura uko indirimbo zicurangwa, mu Bwongereza kugura za cassette byiyongereye ku kigero cya 103% mu mezi atandatu ya mbere ya 2020 ugereranyije no mu gihe nk’icyo mu mwaka wabanje.

No muri Amerika, nkuko bitangazwa n’ikigo Nielsen Music, kugura za cassette byiyongereyeho 23% mu 2018 ugereranyije no mu 2017.

Lou Ottens wavumbuye Cassette

Src: BBC

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO