Madamu Jeannette Kagame yitabiriye amasengesho yatangiwemo impanuro ku kubaka umuryango mwiza.

Nyakubahwa Madamu Jeannette Kagame yitabiriye amasengesho yo gusengera igihugu no kugira inama abayobozi bakiri bato ku ‘Kubaka umuryango muzima kandi ugamije kubaka igihugu cyiza’, yabereye muri Kigali Convention Centre, kuri uyu wa gatandatu tariki 11 Mutarama 2020.

Muri iyi nama yahawe insanganyamatsiko ‘Kubaka umuryango muzima kandi ugamije kubaka igihugu cyiza’, Nyakubahwa Madamu Jeannette Kagame yatanze ikiganiro cyihariye cyiswe ‘Conversation with the First Lady’, cyayobowe n’Umushumba Pst Didier Habimana.

Jeannette Kagame yatangiye ikiganiro ashimira ubuyobozi bw’ihuriro rya Rwanda Leaders’ Fellowship, bwateguye uyu mwanya, kugira ngo abayobozi bakiri bato baganire ku ‘Kubaka umuryango muzima kandi ugamije kubaka igihugu cyiza’.

Madamu Jeannette Kagame yasubije ikibazo ku bijyanye n’uruhare umuryango wagize mu kubaka igihugu

Yagize ati “Kubera amateka yacu nk’abanyarwanda, kuvuga umuryango byari bigoye. Abenshi muri rusange ntibari bagifite ababo. Ababyeyi bagombaga guhekera u Rwanda bararuhekuye ariko twagize amahirwe tugira ubuyobozi buduha umurongo ngenderwaho. Umuryango washyize mu bikorwa uwo murongo, bituma igihugu kigira icyerekezo.”

Yavuze ko ‘Kimwe mu by’ingenzi cyafashije umuryango nyarwanda ni ukongera kugira ubumwe nka kimwe mu byavuye mu murongo twahawe. Munyemerere mbabaze mwebwe muturutse mu matorero atandukanye: Mwatwizeza iki muzakomeza gukora ngo mukomeze muharanire ibyo twagezeho?’

Madamu Jeannette Kagame yavuze no ku bibazo bikibangamiye umuryango muri iki gihe, byanabangamira kugira igihugu gikomeye.

Yagize ati “Bimwe mu bibazo tugifite ukunanirwa guhuza inshingano zo kuba umubyeyi, umuyobozi ndetse no kwita ku wo mwashakanye.”

Akomeza agira ati “Dufite abakiri bato benshi bafite impungenge zo gushaka no kubaka imiryango. Dufite abashakanye bapyinagaza bagenzi babo kugira ngo berekane ububasha babafiteho kandi n’ababikorerwa bakabyemera, ndetse imiryango n’incuti zabo zirebera.”

Akomeza avuga ko ‘Dusubire mu mateka yacu y’ubudahemuka, byari igisebo kandi n’ikizira ko umuntu yahohotera undi. Mu muco wacu, iteka umubyeyi yarindaga abana be. Ntabwo gukubita no guhohotera uwo mwashakanye twigeze tubyigishwa n’umuco wacu. Ntabwo ari iby’I Rwanda.’

Yakomeje avuga ko ‘Mu gukomeza gutekereza no gushakisha bimwe nabasangiza nanjye naje kumenya ko habaho n’umunsi mukuru w’abashakanye (the World Marriage Day), uba tariki ya 9 Gashyantare! Ubwo muzawibuke mwese.’

Muri iki kiganiro umufasha w’umukuru w’igihugu yagiye agaruka ku bintu bitandukanye byafasha mu kubungabunga umuryango, tuzagarukaho birambuye mu nkuru zacu zitaha.

Ni amasengesho kandi yanitabiriwe na Nyakubahwa Augustin Iyamuremye, Perezida w’Inteko Ishingamategeko Umutwe wa Sena, abayobozi batandukanye, abikorera,amadini n’amatorero.

Aya masengesho abaye ku nshuro ya 25, yatangijwe na Rwanda Leaders Fellowship, atanga umwanya wo kuganira ku bikorwa by’umwaka ushize, gushyiraho ingamba zo gukora neza kurushaho mu mwaka ukurikiyeho, banasengera igihugu ndetse n’abayobozi mu nzego zose.

Genesisbizz

Related Articles

TANGA IGITEKEREZO