Madamu Jeannette Kagame yitabiriye umuhango wo kumurika filime “Petit Pays “

Filime Petit Pays (Igihugu Gito) y’umuraperi w’umunyarwanda ufite ubwenegihugu bw’u Bufaransa, Gaël Faye yamurikiwe mu Rwanda, mu muhango witabiriwe na Madamu Jeannette Kagame. Petit Pays akaba ni filime ishingiye ku gitabo uyu muraperi yanditse, bikaba biteganijwe ko izashyirwa ahagaragara ku mugaragaro tariki ya 18 Werurwe 2020.

Filime Petit Pays yamuritswe mu muhango witabiriwe n’abantu b’ingeri zitandukanye, bari bakoraniye muri Century Cinema mu Mujyi wa Kigali ku mugoroba wo kuri uyu wa Gatandatu tariki 07 Werurwe 2020.

Gael Faye yageze i Kigali ku mugoroba wo kuwa Kane nyuma y’uko iyi filime yerekanwe mu Mujyi wa Lille kuwa 25 Gashyantare; kuwa 26 yerekanwa i Toulouse, kuwa 27 yerekanwe i Arles, kuwa 28 yerekaniwe Avignon, kuwa 02 Werurwe i Nice, kuwa 03 i Toulon naho kuwa 04 Werurwe yerekanwe i Aix-En Provence.

Nyuma yo kuva i Kigali iyi filime izerekanwa i Reims kuwa 13 Werurwe ahitwa Opéraims naho kuwa 17 Werurwe yerekanirwe mu Mujyi wa Paris. Gael Faye ati "Nzabamenyesha vuba aho bizabera n’amasaha."

Uyu muraperi aheruka i Kigali kuwa 19 Gashyantare 2019 ubwo yamurikaga igitabo cye yise “Petit Pays” cyahinduwe mu kinyarwanda na Olivier Bahizi Uwineza.

Filime “Petit Pays” irimo inkuru y’ubuzima bw’umwana wavukiye i Burundi abyarwa n’umunyarwandakazi w’impunzi n’umuzungu w’Umufaransa. Muri icyo gitabo, uwo mwana avuga uko yabonaga ubuzima muri icyo gihe, ibibazo by’amoko, Hutu na Tutsi.

Uwo mwana uba ufite hagati y’imyaka 10 na 15, aba yibuka uburyo ubuto bwe bwaje kwicwa n’ibibazo bya politike zo muri aka karere. Anavuga ku kibazo cyo kuvuka ku babyeyi badahuje uruhu.

Nyuma yaje guhungishirizwa i Burayi ari nabwo yaje kubona ko kuba imvange bigoye kuko haba i Burundi no mu Burayi, hose abantu bamufataga nk’umunyamahanga. Amaze gukura yiyemeje kugaruka muri Afurika kuko ariho nibura yumvaga ari iwabo. Mu byatumye yumva yigaruriye icyizere ni ugukunda gusoma no kwandika.

Iki gitabo kivuga ku mateka yaranze u Burundi n’u Rwanda, mu myaka ya za 1990 na nyuma yaho.

Guhera tariki 14 Mutarama 2019, iyi filime ifite iminota 111 yatangiye gukinirwa mu Karere ka Rubavu iyobowe n’Umufaransa Eric Barbier.


Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO