Madam Kagame avuga ko umuryango ukwiye gushingira ku ndagagaciro z’umuco

Madame wa Perezida wa Repubulika Jeannette Kagame yasabye Abanyarwanda kwimakaza umuco w’ubupfura mu rwego ku kubaka umuryango uhamye.

Ibi yabitangarije mu biganiro byahuje abayobozi mu nzego zitandukanye zirimo n’urubyiruko rw’abayobozi bakiri bato.

Ibibazo bishingiye ku kudakoresha imbuga nkoranyambaga mu gihe gikwiye mu bashakanye, kutagirana ibiganiro hagati yabo, kutabwizanya ukuri no kudaha umwanya abana, ni bimwe mu byagarutsweho nk’intandaro y’ikibazo cy’isenyuka ry’ingo muri iki gihe.

Bamwe mu bitabiriye ibi biganiro basanga umuryango muzima ari ishingiro ry’iterambere ry’igihugu.

Didier Habimana avuga ko umuryango ari inshingiro ry’ibintu byose, agashimangira ko abantu bakwiye kuwuha umwanya.

Ati “Umuryango wabayeho mbere y’uko leta zibaho, umuryango wabayeho mbere y’uko campany dukorera zibaho, umuryango wabayeho mbere y’uko amatorero abaho, umuryango ni ishingiro ryo kubaka igihugu, umukoro wa mbere ni uko dukwiye kwita ku muryango tukabonera umwanya abana bacu, tukabonera umwanya abo twashakanye.”

Umuyobozi w’umuryango Rwanda Leaders Fellowship unategura iki gikorwa buri mwaka Eric Munyemana avuga ko amasengesho y’uyu mwaka yibanze ku biganiro bigamije kubaka umuryango ukomeye. Ibi bigaterwa n’uko umuryango uhamye utanga isura nziza no muruhando mpuzamahanga.

Ati “Umuntu wese ajye amenya ko iyo ataba umuryango ntabwo aba ariho, bivuze ko nihatabaho umuryango mwiza bivuze ko ejo hazaza ntabwo azaba ari heza, yaba umuhungu, umukobwa, umupapa, umu mama buri wse akwiye gushyira imbaraga mu kubaka umuryango, bigira ingaruka nziza kuri we, kubo abana nabo ndetse n’igihugu muri rusange.”

Yakomeje agira ati “Iyo igihugu kibaye cyiza wabonye ko n’ibindi bihugu biza kutuvomaho, rera urugendo tumaze kugenda turugejejweho n’ubuyobozi bwiza, imikorere myiza ndetse n’imiryango yabigizemo uruhare.”

Muri ibi biganiro, Madamu wa Perezida wa Repubulika Jeannette Kagame yagaragaje ko Abanyarwanda bakwiye gusubira mu mateka yabo bakavomamo indangagaciro zo kubaka umuryango uzira amakimbirane.

Yagize ati “Ariko njye ndumva narema agatima abato bari hano, ntabwo ari umuco nyarwanda kubana nabi, iyo umuntu yibutse agasubira no mu mateka iyo basezeraga umugeni ubundi bamubwiraga ko ahantu agiye ari heza cyane ibintu byo gutera ubwoba ko aho ugiye ari ibibazo ko umugabo ari umwana w’undi ni imico y’ahandi.”

Yakomeje agira ati “Numva twasubira mu mateka yacu tukavomayo za ndangagaciro z’ubupfura zo kudahemuka, byatumaga abantu bakomera kuko cyari igisebo kuba umuntu yahohotera uwabandi.”

Madamu Jeannette Kagame yasubije iikibazo kijyanye n’uko ahuza inshingano zo kuba umuyobozi, umubyeyi, umugore, aharanira kubaka umuryango mwiza.
Yagize ati “Turi abantu basanzwe, ntabwo turi ibitangaza. Ubuzima bwacu natwe ni nk’ubw’indi miryango. Natwe ibibazo bigora indi miryango duhura nabyo.”

Yakomeje agira ati “Habanza urugo n’inshingano z’umubyeyi, izindi zose ziza ari inyongera. Gufatanya nuwo mwashakanye byoroshya byinshi. Ndifuza kurema agatima abakiri bato. Mukwiriye kumenya ko buri rugo rugira umwihariko.”

Madamu Jeannette Kagame yanakomoje ku bijyanye no kurera abana nk’ababyeyi ko bafatanya, bakabijyaho inama bakungurana ibitekerezo ariko cyane cyane bakagira ubumwe.

Yagize ati “Nta mwana usa n’undi, ariko si nako bihora ari ibibazo, hari n’ibindi byinshi byo kwishimira. Ababyeyi bashyize hamwe, bagahuza indangagaciro nziza bakazitoza abana, babasha kubaka umuryango mwiza. Imbuto mwabibye ni nazo musarura mu muryango wanyu.”

Yunzemo ati “Hari abavuga bati ‘umwe ni umutwe w’urugo undi ni umutima ariko umuntu akwiye kuba yuzuye, mukuzuzanya.’ Mugomba kubana muri byose no gusangira byose, mutavuga ngo ‘abana beza ni aba se.’ Nta shema riri mu kumva ufite abana utita abawe kuko batitwaye neza.”

Madamu Jeannette Kagame yasoje ikiganiro atanga umukoro ku bitabiriye iki kiganiro wo kuzirikana ko mu cyerekezo cya 2050 bafite inshingano zo gutegurira Keza Nyiramajyambere wavuzwe cyane mu #Umushyikirano2019 na musaza we Cyusa ejo hazaza heza.

Madamu Jeannette Kagame kandi yabwira abayobozi bakiri bato bitabiriye ‘YoungLeadersPray’ ko igihugu cyiza kigirwa n’imiryango myiza, imiryango ifite ubuzima bwiza n’umutekano muri byose. Nubwo hari amategeko ahana ukora ihohoterwa wese, abantu ntibakwiye kurebererera ngo baceceke.


Madame wa Perezida wa Repubulika Jeannette Kagame yasabye Abanyarwanda kwimakaza umuco w’ubupfura mu rwego ku kubaka umuryango uhamye.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO