Mani Martin atewe ishema na Bill Ruzima uzitabira Amani Festival

Umuhanzi Mani Martin arishimira intambwe yatewe na Bill Ruzima wahoze mu itsinda rya Yemba Voice, washyizwe mu bahanzi bazitabira Iserukiramuco rya Amani ryo muri uyu mwaka wa 2020.

Bill Ruzima ukunze kugaragara cyane mu bitaramo bitandukanye aririmbana na Mani Martin, ari ku rutonde rw’abahanzi bikomeye bazaririmbira mu iserukiramuco rya Amani rizabera muri Repubulika Iharanira Demokarasi ya Congo.

Bill Ruzima yatangiye kuririmba ku giti cye mu ntangiriro za Gashyantare 2019, ubwo itsinda yahozemo rya Yemba Voice byavugwaga ko buri wese asigaye akora ukwe, gusa aba basore bahoze ari batatu bakabihakana bivuye inyuma.

Uyu musore ukiri muto yakunze kugaragaza ubushobozi bunyuranye mu bihe bitandukanye, nk’iyo yagiraga amahirwe yo gufasha Mani Martin mu bitaramo bikomeye, byabaga ngombwa ko aza kumuha umwanya nawe akaririmba zimwe mu ndirimbo ze zikundwa na benshi.
Mani Martin na Bill Ruzima bari gutaramira abitabiriye igitaramo cya Kigali Jazz Junction umwaka ushize
Mu butumwa Mani Martin yanyujije ku mbuga nkoranyambaga, akanyamuneza kari kose ubwo yabonaga umusore bakunze gufatanya mu bitaramo, nawe haricyo yatumiwemo kandi gikomeye.

Yagize ati: “Kubona impano ya Bill Ruzima kuri uru rutonde ntakindi byari kumarira uretse kwishimira impano nazamuye, nkita umuhungu wanjye mu muziki…”

Mani Martin yisabiye abategura iri serukiramuco gutiza amatwi impano ya Bill Ruzima uzitabira iri serukiramuco ku nshuro ya mbere.

Mani Martin umaze kwitabira iri serukiramuco inshuro eshatu zose ari umuhanzi, yaherukaga kuryitabira umwaka ushize aho yagiye ari umwe mu bagomba gutanga ibiganiro mu nama yagombaga guhuza abahanzi bari bitabiriye iryo serukiramuco.

Iri serukiramuco rizitabirwa n’abahanzi bikomeye muri aka karere barimo Innoss’B wo muri Congo, Professor Jay wo muri Tanzania, Mbilia Bel wo muri Congo, n’abandi benshi batumiwe.
Byinshi mu bitaramo Mani Martin aririmbamo, Bill Ruzima abari hafi aho
Iri serukiramuco rya Amani rizatangira ku munsi w’ejo tariki 14 Gashyantare 2020 risozwe ku cyumweru tariki 16 Gashyantare 2020 ku ishuri rya Mwanga, aho biteganyijwe ko Bill Ruzima azaririmba mu isozwa ry’iri serukiramuco ku cyumweru tariki 16 Gashyantare 2020.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO