Marcus Rashford avuga ko atazigera na rimwe asaba imbabazi

Rutahizamu w’Ubwongereza na Manchester United Marcus Rashford yasabye imbabazi abafana kubera guhusha penaliti ariko avuga ko nta na rimwe asaba imbabazi z’uwo ari we nyuma yuko abaye umwe mu bakinnyi batatu bakorewe irondaruhu.

Rashford, hamwe na Jadon Sancho na Bukayo Saka, bahushije penaliti ku mukino wa nyuma wa Euro 2020 Ubwongereza bwatsinzwemo n’Ubutaliyani ku cyumweru kuri penaliti 3-2.

Uko ari batatu, nyuma y’uwo mukino ku mbuga nkoranyambaga hari bamwe babakoreye ihohoterwa rishingiye ku irondaruhu.

Mu itangazo yasohoye, Rashford yanditse ati: "Niyumvisemo ko ari nkaho natengushye buri muntu wese".

Uyu mukinnyi w’imyaka 23 yongeyeho ati: "Umunsi wose nshobora kwemera kunengwa ku mikinire yanjye, penaliti yanjye ntabwo yari nziza bihagije, yagakwiye kuba yarinjiye mu izamu ariko nta na rimwe nzasaba imbabazi z’uwo ndi we n’aho nkomoka".

"Nta kindi gihe kintera ishema kurusha iyo nambaye umwenda uriho ziriya ntare eshatu [ni na ryo zina ry’ikipe y’igihugu y’Ubwongereza] mu gatuza kanjye no kubona umuryango wanjye umfana uri mu mbaga y’abantu babarirwa mu bihumbi za mirongo".

Ifoto yo kumuha icyubahiro ishushanyije ku rukuta mu mujyi wa Withington aho Rashford avuka, yangijwe mu isura nyuma yuko ahushije penaliti, nyuma iza gushyirwaho ubutumwa bwo kumushyigikira.

Rashford avuga ko atazigera asaba imbabazi bitewe n’aho akomoka

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO