Mashami Vincent yababajwe n’imisifurire ndetse n’ibyo bakorewe na Cameroun

Ikipe y’igihugu Amavubi ku mugoroba wo kuri uyu wa kabiri tariki 30 Werurwe 2021 nibwo yakinnye umukino n’ Ikipe ya Cameroun ’les Lions Indoptables’ baranganya gusa umutoza Mashami Vincent atangaza ko atishimiye imisifurire yaranze uwo mukino.

Wari umukino wa 6 mu itsinda F byasabye ko hakinwa imikino yo ku munsi wa nyuma hibazwa ikipe isanga Cameroun yari ifite amanota 10 mbere y’umukino.

Umukino watangiye amakipe yombi ubona yihagazeho cyane. Igice cya mbere kirangira amakipe yombi anganya ubusa ku busa abanyarwanda bakomeza kugira icyizere cy’uko amavubi ashobora kwerekeza muri CAN 2021

Nyuma y’iminota 10 igice cya kabiri gitangiye, umunyezamu w’u Rwanda, Kwizera Olivier, yahawe ikarita itukura nyuma yo gukinira nabi Moumi Ngamaleu wari ucomekewe umupira ari hafi kwinjira mu rubuga rw’amahina.

Kwizera n’ubundi yari yasibye umukino wa Mozambique kubera ikarita nk’iyi yabonye ku ikosa nk’iryo, muri ¼ cya CHAN 2020 na yo yari yabereye muri Cameroun.

Umutoza Mashami Vincent yahise akora impinduka, Mvuyekure Emery ajya mu izamu asimbuye Iradukunda Bertrand.

Mvuyekure wigaragaje ku mukino wa Mozambique, yongeye kwigaragaza kandi ku buryo bw’ishoti ryatewe na Vincent Aboubakar ku munota wa 62, umunyezamu w’Amavubi awushyira muri koruneri.

Sugira Ernest yasimbuye Byiringiro Lague mu minota 12 ya nyuma, ariko ntacyo byafashije Amavubi atabonye uburyo bugana mu izamu dore ko n’umupira watewe na Kagere Meddie ukajya ku ruhande, umusifuzi wo ku ruhande yerekanye ko hari habayeho kurarira.

Umukino waje kurangira ari ubusa ku busa bituma Ikipe y’igihugu Amavubi amahirwe yari ifite yo kwerekeza mu gikombe cy’Afurika y’ibihugu kizabera muri Cameroun mu kwezi kwa mbere ayoyoka burundu. Muri iri tsinda hakomeje ikipe ya Cameroun hamwe na Cap Verde yabaye iya kabiri kuko yari yatsinze Mozambique.

Nyuma y’uyu mukino, umutoza Mashami Vincent aganira n’itangazamakuru yatangaje ko yababajwe n’ibyo bakorewe n’ishyirahamwe ry’umupira w’amaguru muri Cameroun, ryatangaje ko abakinnyi batatu b’Amavubi banduye Coronavirus, ariko hafatwa ibindi bizami bagasanga ni bazima.

Yagize ati “Imyitwarire y’umusifuzi yadutunguye cyane, iyi mikino igamije kuzamura umupira wa Afurika ndetse no kuzamura impano, urebye imyitwarire ye nawe wagira ngo ni umuturage wa Cameroun winjiye mu kibuga, ni ikipe isanzwe ifite itike ariko sinzi impamvu y’iyi myitwarire.”

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO