Mashami yasezereye abandi bakinnyi barimo Mico Justin

Umutoza w’ikipe y’igihugu Amavubi Mashami Vincent yasezereye abandi bakinnyi batatu harimo babiri ba Police FC hamwe n’undi ukinira ikipe ya Gasogi United.

Ibi yabikoze nyuma y’imyitozo y’ejo hashize, aho yahisemo gusezerera abandi bakinnyi batatu barataha, ni mu gihe akomeje kwitegura umukino wa Cape Verde mu gushaka itike y’igikombe cy’Afurika cya 2022.

Abakinnyi basezerewe ni rutahizamu wa Gasogi United Iradukunda Jean Bertrand, umukinnyi ukina hagati afasha abashaka ibitego muri Police FC Mico Justin na Twizerimana Martin Fabrice na we ukina hagati mu kibuga muri Police FC.

Nubwo yasezeye aba bakinnyi aheruka kwakira abandi 11 bo mu ikipe ya APR FC kuko bo batari baratangiranye imyitozo n’abandi.

Kugeza ubu hari n’abakina hanze y’igihugu bamaze kugera inaha ariko abenshi bakaba bitezwe ko baza kuhagera uyu munsi.

Kuva iyi kipe yatangira umwiherero ni ku nshuro ya kabiri Mashami asezereye abakinnyi, ni nyuma yo gusezerera abagera kuri 6 mu gice cya mbere cy’imyitozo yari yabanje.

U Rwanda ruzasura Cap-Vert mu mukino ubanza uteganyijwe tariki ya 11 Ugushyingo mu gihe uwo kwishyura uzabera i Kigali tariki ya 17 Ugushyingo 2020.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO