Mexique:Abadepite batoye itegeko ryemerera abaturage gukoresha urumogi

Mu gihugu cya Mexique umutwe w’abadepite mu nteko ishinga mategeko watoye itegeko ryemeza umushinga w’ikoreshwa ry’urumogi mu bikorwa byinshi bifite aho bihurira n’ibyishimo.

Nyuma y’uko iryo tegeko ritowe harakurikiraho ko rijyanwa mu nteko ishinga amategeko umutwe w’abasenateri, mu gihe ishyaka riri ku butegetsi rya Perezida Andrés Manuel López Obrador rifite icyizere ko riri butorwe.

Iri tegeko riramutse ritowe biravugwa ko iki gihugu cya Mexique cyahita kiba kimwe mu masoko akomeye kandi manini y’urumogi kuko abaturage baho baba bibera mu munyenga wo kurunywa, kurukoresha no kurucuruza.

Mu myaka ishize igihugu cya Mexique cyavugwagamo ibikorwa bya hato na hato by’ubwicanyi bwabaga hagati y’ingabo za Leta ndetse n’amatsinda y’abaherwe bacuruzaga urumogi muri icyo gihugu, ibikorwa byagwagamo inzirakarenga nyinshi buri mwaka .

Nkuko tubikesha Ikinyamakuru BBC abadepite basaga 316 batoye uwo mushinga naho abandi 129 barawanga. ibi kandi si ubwa mbere kuko n’umwaka ushize ryateje ibibazo hagati y’imitwe yombi mu nteko ishinga amategeko .

Muri Mexique biteganyijwe ko iryo tegeko niryemerwa buri muturage wese azaba yemerewe byibura amagarama 28 no guhinga ibiti bitarenze umunani mu rugo rwe .
Iryo tegeko kandi rizaha uburenganzira ku buhinzi, ubwikorezi ndete n’ubushakashatsi ku bigo byinshi mu rwego rwo kubyohereza mu mahanga .

Ku ruhande rwa Perezida López Obrador yavuze ko iri tegeko rizafasha kurwanya amatsinda akomeye acuruza ibiyobyabwenge muri icyo gihugu.

Iri tegeko niryemezwa, Mexico izaba igihugu cya gatatu ku isi, nyuma ya Uruguay na Canada, cyemereye abaturage mu gihugu hose gukoresha urumogi ku mpamvu zo kwishimisha.

Kompanyi zihinga zikanatunganya urumogi zo muri Canada na California biravugwa ko ziteguye guhita zishora amafaranga menshi muri icyo gihugu mu gihe iryo tegeko ryaba ryemewe .

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO