Minisports yashyizeho ingamba zo kwirinda Coronavirus mu mikino

Minisiteri ya siporo mu Rwanda, yasabye amashyirahamwe y’imikino ya siporo ko mu rwego rwo kwirinda icyorezo cya COVID 19 cyibasiye isi, bagisha inama amashyirahamwe ayakuriye ku rwego rw’Afurika ndetse n’isi bagaheraho bafata umwanzuro wo kutitabira amwe mu marushanwa ateganyijwe kuba.

Mu itangazo ryashyizwe hanze kuri uyu wa 12 Werurwe 2020, bavuze ko bafashe ingamba zitandukanye mu rwego rwo kwirinda icyo cyorezo cyugarije isi by’umwihariko muri Afurika, ariko bashishikariza ingaga za siporo mu Rwanda kugisha inama inzego zizikuriye.

Olivier Karambizi, umuvugizi wa minisiteri ya siporo mu Rwanda, yabwiye Genesisbizz ko mu bufatanye bafitanye n’amashyirahamwe y’imikino mu Rwanda, babasabye ko basubika ingendo zo kujya mu mahanga mu rwego rwo kwirinda icyorezo cya CoronaVirus.

Uyu mugabo kandi yavuze ko batigeze babuza amashyirahamwe y’imikino mu Rwanda kwitabira amarushanwa atandukanye yo muri Afurika nkuko byari byanditswe ku n’ibitangazamakuru bitandukanye, avuga ko ahubwo minisiteri yabagiriye inama zo kumenyesha abategura ayo marushanwa ko batazitabira.

Yagize ati: “Ntabwo aribyo, ntabwo twababujije kwitabira amarushanwa mpuzamahanga ahubwo twabagiriye inama ko niba bishoboka bayasubika cyangwa bakamenyesha n’abayategura ko batazitabira. Twasabye ingaga z’imikino kugisha inama ingaga zayo ku rwego rw’isi no ku mu gabane w’Afurika ku ngamba zashyizweho, kuko twebwe nizo tuzashingiraho dufata umwanzuro wo kwitabira cyangwa niba tutazitabira.”

Mu mupira w’Amaguru, kuri uyu wa kane nibwo ishyirahamwe ry’umupira w’amaguru muri Afurika CAF, ryohereje muri cameroon inzobere mu by’ubuvuzi kugira ngo zirebe niba hari ingamba zihagije icyo gihugu cyafashe zo kwirinda icyorezo cya Coronavirus mu gihe haba hari gukinwa imikino ya CHAN 2020. Izi nzobere, zizatanga umwanzuro kuri CAF niba iri rushanwa rigomba gukinwa cyangwa rigasubikwa.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO