Miss Muheto yakiriwe mu biro bya Guverineri w’Intara y’Uburengerazuba

Ku munsi w’ejo taliki 04 Mata 2022 nibwo Miss Nshuti Muheto Divine wegukanye ikamba rya Nyampinga w’U Rwanda 2022 yakiriwe mu biro bya Guverineri w’Intara y’Uburengerazuba ari naho uyu mukobwa akomoka.

Miss Muheto yiyamamarije mu Ntara y’uburengerazuba ayihesha ishema nyuma y’imyaka igera kuri ine ryihariwe n’abakobwa bakomoka mu mujyi wa Kigali.

Mu biganiro yagiranye na Guverineri Habitegeko harimo umushinga afatanyije na Africa Improved Food (AIF) wo kurwanya igwingira n’ikibazo k’imirire mibi mu bana aho Miss Muheto ateganya gutangiza uyu mushinga muri iyo Ntara.

Ni murwego rwo kurushaho gutanga umusanzu we nka Nyampinga w’U Rwanda biciye muri gahunda igihugu cyihaye yo guhashya igwingira ry’abana.

Intara y’uburengerazuba iri mu Ntara zugarijwe n’iki kibazo kijyanye n’igwingira ry’abana dore ko Uturere twinshi tugize iyi Ntara dufite iki kibazo Akarere ka Ngororero gafite 50.5 % mu igwingira ry’abana ndetse kagakurikirwa na Rutsiro hamwe na Nyabihu.

Guverineri Habitegeko uyobora Intara y’Uburengerazuba yashimiye cyane Miss Muheto k’umurava akomeje kugaragaza nyuma y’igihe gito yambitswe ikamba rya Miss Rwanda 2022.

Guverineri Habitegeko yabwiye Miss Muheto ko biteguye gukomeza gufatanya nawe mu rugendo rwo kwesa imihigo kandi ko bishimiye intsinzi ye.

Miss Muheto yambitswe ikamba rya Nyampinga w’U Rwanda mu birori biboneye ijisho byabaye kuwa 19 Werurwe 2022 mu Intare Conference Arena.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO