Miss Rwanda izagaruka COVID-19 itagihari…Ba Miss bongewe ‘igihe’ ngo byabagwa neza

Byari bimaze kumenyerwa ko muri uku kwezi kwa Ugushyingo buri mwaka aribwo abakobwa bifuza kujya muri Miss Rwanda batangira kwiyandikisha. Abaritegura bavuga ko bagitegereje kubera Coronavirus mugihe abatowe nabo bavuga ko imishinga yabo itakozwe neza bakifuza ko bongerewe manda bitabagwa nabi.

Umwaka ushize Tariki 20 Ugushyingo nibwo Rwanda Inspiration back up itegura Miss Rwanda yasohoye itangazo rihamagarira abakobwa kwiyandikisha harimo n’ibisabwa kugirango bahatane.

Kubera icyorezo cyugarije isi cya Covid-19 hari ibintu byinshi byagiye bihagarara harimo n’ibitaramo gusa bamwe mu babitegura bagiye bashyiraho uburyo bwo kubikora ariko bakubahiriza n’amabwiriza yashyizweho yo kwirinda cyangwa se bagakoresha ubundi buryo.

Miss Rwanda ni irushanwa rivugisha abantu benshi iyo riri kuba kuko igihugu cyose kiba kirihanze amaso kugirango berebe umukobwa wambikwa ikamba.

Ishimwe Dieudonne uzwi nka Prince Kid utegura iri rushanwa yaganiriye na Genesis Tv avuga kuri gahunda bafite niba rizabaho cyangwa se bazategereza iki cyorezo kigacika.

Ati “Ni ugutegereza rwose tukareba uko bizagenda kuko natwe ntacyo dufite twakora. Ntabwo turamenya ikizakorwa ni ukurindira Covid tukabona kuzafata umurongo neza.”

Miss Rwanda 2020 Nishimwe Naomie n’ibisonga bye bose bari bafite imishinga isaba guhuriza abantu hamwe mu ruhame ariko kubera biri mu bintu bitemewe nabo ntibyabagendekeye neza.

Umwiza Phiona wabaye igisonga cya mbere aganira na Genesis Tv yavuze uko abibona kimwe na bagenzi be.

Avuga ko ubu yatangiye gukora ku mushinga we nubwo ugenda ugaruka ku bantu benshi ugasanga bigoye kuko bitemewe ko abantu benshi bahurizwa hamwe.

Ati “Ku giti cyanjye nari mfite guhuza amatsinda y’abantu, ntibyabaye ariko umuntu ashaka buryo ki yabikoramo. Covid nirangira n’ubundi nzakomeza mbikore.”

Umukobwa watowe iyo agiye kuvaho buri mwaka habaho igitaramo mva na njya rugamba aho uwatowe aba ari guhiga ibyo azakora uvuyeho nawe akerekana ko ibyo yahize yabigezeho.

Hari bimwe mu bihugu bitandukanye byagiye biha amahirwe abakobwa batowe bakabongera igihe kugirango babone uko bakora ibikorwa byabo.

Kuri Phionah ngo abategura Miss Rwanda babahaye icyo gihe byaba ari byiza cyane.

Ati “Icyo nabivugaho ni uko ababitegura bafite uburyo babikoramo niba babona ko dukwiye kongezwa babikora ariko sinavuga ngo batwongeze ariko niba babona bikenewe bazabikora kuko inshingano n’ibikorwa by’umuntu ntaho biba bigiye. Icyo nzakora ni ugutanga ikamba ariko ibindi byo nzabikomeza.”


Prince Kid avuga ko ubu ataramenya icyo gukora ategereje ko Covid ibanza ikava mu nzira


Covid ngo yabangamiye Miss n’ibisonga bye mu gushyira mu bikorwa imishinga yabo

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO