Urugamba ndarwiteguye cyane na Bikini nzayambara ntakabuza – Miss Umuratwa Anitha

Umuratwa Anitha Kate uheruka kwegukana ikamba rya Miss Supranational Rwanda yatangajeko azahagarararira u Rwanda neza muri aya marushanwa ku rwego rw’Isi ndetse ko nta nikizamubuza kwambara Bikini.

Mu mpera z’icyumweru gishize nibwo mu Rwanda hasojwe amarushanwa ya Miss Supranational Rwanda 2021 aho yaje kwegukanwa na Miss Umuratwa Kate Anitha wamenyekanye ubwo yitabiraga irushanwa rya Miss Rwanda 2020.

Mu kiganiro cyitwa Avenue 387 kinyura kuri Televiziyo ya GENESIS yavuze ko yiteguye neza kandi ko ibisabwa byose muri iri rushanwa yiteguye kuzabikora kugirango azitware neza.

Usanga hari abakobwa baserukira u Rwanda muri aya marushanwa mpuzamahanga ariko bimwe bakanga kubikora bitewe n’umuco Nyarwanda. Ahanini usanga ikitavugwaho rumwe ari umwambaro wa Bikini.

Umuratwa we ngo ntabwo ibyo byaba imbogamizi kuko yagiye kuza muri iri rushanwa abizi ko biri mu bintu bigenderwaho kugirango umukobwa abe yaryegukana.

Ati “Bikini nzayambara ntakabuza gusa buriya ziba zifite n’ubwoko bwinshi njyewe rero hari igihe nazambara itansebya kuko biriya aba ari ibirori isi yose ireba.”

Uyu mukobwa avuga ko iyo ataza kuba Miss Supranational Rwanda 2021 yari guhita ava mu bikorwa byose bijyanye n’amarushanwa y’ubwiza.

Ati “Umwaka ushize nitabiriye Miss Rwanda sinagira amahirwe yo kuyegukana, uyu wo nza muri iri rero naho iyo bitagenda neza nari guhita mbihagarika nkajya gukora ibindi gusa byagenze neza ngera ku nzozi zanjye.”

Nyuma yo kwegukana iri rushanwa yahembwe Miliyoni y’Amanyarwanda ndetse no guserukira igihugu muri Pologne mu irushanwa rya Miss Supranational ku rwero rw’Isi.

Kuva mu 2011 ni bwo u Rwanda rwinjiye mu bihugu bisaga 80 bikunze kwitabira irushanwa ngarukamwaka ry’ubwiza rya Miss Supranational.

Muri uwo mwaka hagiyeyo Uwamahoro Yvonne, mu 2012 hajyayo Kubwimana Simbi Sabrina, mu 2013 hajyayo Mutesi Aurore Kayibanda, mu 2014 hagenda Umwali Neema Larissa, Gisa Sonia ajyayo mu 2015, Akiwacu Colombe mu 2016 , Ingabire Habiba mu 2017, Uwase Clementine mu 2018 na Umunyana Shanitah witabiriye irya 2019.

Miss Umuratwa Anitha ngo ntakizamubuza kwambara Bikini

Yatowe nka Miss Supranational Rwanda 2021

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO