Miss Uwihirwe Yasipi yitabiriye isiganwa rya Triathlon aba uwa kabiri mu Bategarugori

Uwihirwe Yasipi Casmir wabaye igisonga cya Miss Rwanda 2019 yitabiriye isiganwa rya Triathlon ryabereye mu karere ka Nyagatare mu mpera z’icyumweru twasoje, aba uwa kabiri mu Bategarugori.

Nyuma yaho bafunguriye imikino, ishyirahamwe ry’umukino wa Triathlon mu Rwanda ryongeye gutegura irushanwa ryarabereye mu Karere ka Nyagatare tariki 05 Kamena 2021.

Umukino wa Triathlon uba ugizwe n’ibice bitandukanye aho abasiganwa biruka n’amaguru, kunyonga igare ndetse no gusiganwa boga.

Iri ryabereye Nyagatare kuko hatajemo gusiganwa ‘Boga’ rihita rihindurirwa izina rikitwa Duathlon.

Uwihirwe Yasipi nawe ni umwe mu bitabiriye iri siganwa ryabereye mu karere ka Nyagatare. Kuri we bwari ubwa mbere agiye kugerageza amahirwe asiganwa n’abandi harimo nababigize umwuga.

Aganira na Genesisbizz/TV yavuze ko kwiruka byo asanzwe abikora ndetse no kunyonga igare nabyo atari ibintu bishya kuri we.

Ati “Biriya bintu kubihuza icyarimwe ntabwo biba byoroshye gusa naragerageje bishoboka kuko na kumanywa ku zuba. Nakoresheje igihe kingana n’amasaha atatu n’iminota isaga 15 nkora ibirometero 55 muri rusange, ngira n’amahirwe yo kuba uwa kabiri mu Bategarugori.”

Yasipi akomeza avuga ko yishimiye iri rushanwa kandi ko n’ikindi gihe azongera akaryitabira.

Nubwo atagize amahirwe yo kuryegukana yabaye uwa kabiri mu bakobwa bari bitabiriye. Dore ko uwamusize we asanzwe akina uyu mukino kuko azanahagararira u Rwanda muri aya marushanwa mu gihugu cya Misiri.

Mu cyiciro cy’abagore, All Wahida Dhinira yabaye uwa mbere akoresheje amasaha 3, umunota umwe n’amasegonda 33 naho Miss Uwihirwe Yassip Casmir aba uwa kabiri akoresheje amasaha 3 iminota 13 n’amasegonda 50.

Iri siganwa ryitabiriwe n’abakinnyi 19 barimo abagabo 17 n’abagore 2 aho basiganwe intera ya kilometero 10 n’amaguru, kilometero 40 n’igare basoza bakora kilometero 5 n’amaguru byose hamwe biba kilometero 55.

Yasipi yabaye uwa kabiri mu bategarugori

Yasipi avuga ko azakomeza kwitabira aya marushanwa

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO