Mohamed Salah yaciye agahigo ko gutsinda ibitego 100 mu gihe gito

Mohammed Salah yabaye umukinnyi wa mbere mu mateka ya Liverpool ubashije kuyitsindira ibitego 100 mu gihe gito kurusha abandi bose muri shampiyona y’umupira w’amaguru ihuza amakipe yo mu Bwongereza izwi nka English Premier League.

Salah ukomoka mu gihugu cya Egiputa (Egypt) yabaye umukinnyi ukomeye muri Liverpool avuye muri Roma mu mwaka wa 2017.

Kuri uyu wa gatandatu dusoje nibwo Mohamed Salah yatsinze igitego cye cy’100 ku munota wa 54 mu mukino wabahuzaga n’ikipe ya Brentford.

Ibi byahise bituma aca agahigo ko gutsindira ibitego 100 ikipe ya Liverpool mu gihe gito cyane undi mukinnyi wese atigeze abasha gukora mu mateka y’iyi kipe.

Salah yatsindiye Liverpool ibitego 100 mu mikino 151 yonyine yakiniye iyi kipe. Uwaherukaga guca aka gahigo yari Roger Hunt uyu akaba yaratsindiye Liverpool ibitego 100 mu mikino 152.

Kugeza ubu aka gahigo ko gutsinda ibitego 100 kamaze gukorwa n’abakinnyi batanu gusa batojwe n’umutoza umwe aribo: Salah watsinze ibitego 100 atozwa na Jurgen Klopp, Wayne Rooney, Ryan Giggs na Paul Scholes bose uko ari batatu batsinze ibitego 100 batozwa na Sir Alex Ferguson ukongeraho Thierry Henry watsinze ibitego 175 ku ngoma y’umutoza Arsene Wenger.

Nyuma y’uko Mohamed Salah aciye aka gahigo, umutoza we Jurgen Klopp mu kiganiro n’itangazamakuru yishimiye cyane aka gahigo aho yagize ati ’’Mo ni imashini y’ibitego, ubunyamwuga bwe ni ntagereranywa’’.

’’Akora igishoboka cyose gikwiriye kugirango yegukane intsinzi, niwe ujya mu kibuga mbere agasohokamo nyuma, ibyo byose nibyo biranga Mohamed’’

’’Ikirenze ibyo, usibye kuba afite ubuhanga bwihariye mu kibuga, usanga ari umuntu unyotewe no gutsinda ibitego kandi ibyo ni byiza cyane. Niko bimeze nko ku bandi nka Lewi, ni byiza cyane, biradufasha twese.’’

’’ Buri kimwe cyose wakora mu kibuga, uko waba umeze kose, uba ukeneye umuntu uguha umupira kugirango utsinde igitego cyangwa ugakenera utsinda ibitego, Uwo ni Mohamed, ndetse ibyo byombi arabizi cyane’’

’’ Ntewe ishema cyane no gukorana n’abakinnyi beza mu mwuga wanjye’’

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO