Mugabo/Mugore, sigasira urukundo ukurikije izi nama…ntiruzasaza

Urukundo n’ ikibatsi gikongezwa n’ amarangamutima, iyo wishimiye umuntu ukumva umwitayeho kurenza abandi, ukumva wahora impande ye bisa n’ umuriro ugurumanye gusa iyo mutenyegeje, buhoro buhoro bigenda bigabanyuka, hari nubwo birangira rugakonja.

Uko imyaka ishira, hari abashakanye badakomeza kugaragarizanya urukundo nka mbere, wa mwanya wageneraga umukunzi wawe ukagenda ugabanyuka, niba mwaragendaga muterana intambwe ku yindi umwe agatangira kujya agenda asa nuwiruka inyuma yundi, ibyo gusohokana no gutunguzanya ibyishimo bikaba umugani….

None se wakora iki niba mu rugo rwanyu ari uko bimeze?

Gerageza kuba wa wundi yamenye akikubona

Hari ibihe umuntu yibuka akibuka byinshi, urugero niba umukunzi wawe mwarahuriye muri bus imyanya yuzuye ukabona ahagaze, ukamwimukira akicara nyuma mwava mu modoka mukaza kuganira mugahana nimero, bikaza gukomera kugeza ubwo mukundanye nyuma y’ igihe mukaza kwibanira….gerageza kuba wa wundi yabonye bwa mbere umwimukira akabona ko afite umutima mwiza akabigukundira.

Ushobora kubikora rimwe na rimwe mu rugo umukikira, umuterura cyangwa se ukanamuheka igihe mugiye nko kuryama, kumwoza ibirenge cyangwa kumusokoza imisatsi, utibagiwe kandi kumuganiriza umunsi wa mbere umubona uko byari bimeze, ako kanya azibuka muri bus yongere kukwishimira.

Jya umuratira abandi

Kumubwira ko umukunda ni byiza ariko kandi ibuka ko wabimubwiye imbere y’ imbaga bikarenga ukanabisinyira, kumuratira abandi ni kimwe mu bintu bituma yumva afite agaciro gakomeye kuri wowe.

Urugero niba mugiye mu bukwe, mugabo cyangwa mugore ugafata ijambo, ibuka kubanza kwerekana uwo mwashakanye, ubishoboye mushimagize ubwire abandi ko umukunda kandi umwishimira, bizamushimisha kandi bizatuma akomeza kwishimira ko ari mu maboko meza.

Jya umarana igihe n’uwo mwashakanye

Kumarana igihe n’uwo mwashakanye muri mwenyine bikomeza umuryango wanyu kandi ibyo bigaragariza uwo mwashakanye ko wishimira kuba hamwe na we, iyo muhorana bituma mukomeza gusenyera umugozi umwe mu buzima bwa buri munsi, ntacyapfa kuko mugirana inama yuko byagenda ngo birusheho kuba byiza, niba mugiye mu kazi ibuka kumubwira ngo: “Cheri uze gutaha kare”

Icyakora ibyo bishobora kugorana mu gihe mufite inshingano zitandukanye cyangwa umwe akorera kure y’undi, icyo gihe mushobora kwifashisha itumanaho iryo ari ryo ryose.

Mubaze icyo wakora ngo umugaragarize ko umukunda

Buri muntu afite uko yifuza kugaragarizwa urukundo, mu buzima bwa buri munsi umukunzi wawe ujye umuganiriza, umubaze uko yifuza ko umugaragariza urukundo, kandi niba ubona hari ikindi uwo mwashakanye yakora, ukimubwire, jya uzirikana ko kugaragarizanya urukundo ari ngombwa cyane kugira ngo mu muryango wanyu rwogere.

Ryoshya ibiganiro,mwite utuzina turyoheye amatwi

Ibuka kubwira uwo mwashakanye amagambo y’urukundo muganira, ukamwita utuzina, urugero: Hubby,Honey, Daddy, Mumy, Sweetheart n’ andi bizatuma atandukana n’ abandi, nujya umuhamagara azajya yishimira kukwitaba,

Ikindi kandi ushobora no kumwandikira akabaruwa cyangwa ukamwoherereza ubutumwa bukuvuye ku mutima kuri imeli cyangwa se nanone ukamuha message kuri telefoni nta gushidikanya azishimira amagambo meza akuva mu ndiba y’ umutima, ni hahandi azasoma ubutumwa bwawe akabusubiramo inshuro ndwi amwenyura akabubika kure, bizatuma akomeza kugukumbura no kwikwishimira niyo mwaba mutari kumwe.

Mugabo/mugore, kugaragarizanya urukundo ni ngombwa cyane mu muryango wanyu , nkuko umubiri wacu ukenera ibyo kurya buri munsi kugira ngo ugire imbaraga n’ubuzima bwiza niko n’abashakanye bakeneye kugaragarizanya urukundo mu bihe byose kugira ngo bagire umuryango mwiza.

Niyo umugabo n’umugore baba bamaze igihe kirekire babana, buri wese ahora yifuza buri gihe kubona ko akunzwe cyane kandi ko yitaweho by’ukuri, niyo mpamvu wagombye kwitegereza ukamenya icyo uwo mwashakanye akeneye ukamugaragariza urukundo wirinda ko ruzima uzaba uremye paladizo nto urukundo rwanyu rushire rushibuka, bizatuma kandi aticuza ngo yumve ko hari undi wari kumukunda kurusha uko umukunda,

Urukundo ni rwogere!!!

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO