Mukura ikomeje gukubita ahababaza amakipe agiye atandukanye

Ikipe ya Mukura Victory Sports imaze imikino igera kuri itandatu idatsindwa n’indi kipe iyo ari yo yose muri shampiyona ya Rwanda primus national league.

Iyi kipe yo mu karere ka Huye yuzuzaga imikino 6 idatsindwa nyuma y’umukino yatsinzemo Marines FC yo mu karere ka Rubavu.

Uyu mukino wari wabereye ku kibuga mpuzamahanga cya Huye aho Mukura isanzwe yakirira andi makipe.

Ni umukino watangiye ku isaha ya Saa cyenda (15:00) zuzuye, Utangira amakipe yose asatirana ubona buri imwe ishaka igitego.

Ntibyatinze ku munota wa 38’ w’umukino nibwo Mukura yafunguye amazamu ku ruhande rwa Marines ku gitego cya Habamahoro Vincent.

Igice cya mbere cyaje kurangira Mukura iyoboye umukino n’igitego 1-0.

Mbere y’uko bajya kuruhuka Mukura niyo yari iri hejuru kuko yagiye ihusha uburyo bwinshi bubyara ibitego.

Mu minota ya nyuma y’igice cya mbere Mukura yatsinze igitego nyuma umusifuzi wo ku ruhande aracyanga kuko byagaragaraga ko umukinnyi Opoku Mensah wagitsinze yari yaraririye.

Amakipe yombi yagiye kuruhuka nyuma y’igice cya mbere. Mu kibuga cyari cyatose cyane nyuma y’imvura yari imaze guhita mu karere ka Huye, abakinnyi bakomeje guhangana gusa biranga biba iby’ubusa ku ikipe ya Marines yari yasuye.

Ku batoza bombi birinze gukora impinduka hakiri kare kuko ku ruhande rwa Mukura niyo yakoze impinduka za mbere ku munota wa 70’ w’umukino.

Umutoza Rwasamanzi Yves wa Marines we yari yirinze kugira impinduka akora yaje gukora impinduka ku munota wa 80’ w’umukino.

Umukino waje kurangira aka wa mugani w’inkoko iri iwabo ishonda umukara bibaye koko Mukura yihagararaho imbere y’abakunzi bayo. Umukino urangira itsinze Marines 1-0.

Ikipe ya Mukura Victory Sports imaze imikino 6 idatsindwa

Iyi kipe ya Mukura imaze imikino igera kuri 6 idatsindwa. Muri iyo mikino yatsinze amakipe yitwa ko akomeye muri shampiyona y’u Rwanda ndetse n’andi bari mu kiciro kimwe cy’amakipe ari hagati na hagati.

Dore imikino itandatu yose imaze idatsindwa amakipe yagiye itsinda:
Mukura 3-2 Musanze FC
Mukura 1-0 Etincelles FC
Mukura 1-0 Gasogi United
Mukura 1-0 APR FC
Mukura 1-0 Rayon Sports
Mukura 1-0 Marines FC.

Mukura iherutse gusinyisha umutoza mushya Tony Hernandez ukomoka muri Esipanye ntaratsindwa umukino n’umwe. Ubu Mukura ikomeje kuza mu makipe atatu ya mbere.

Mbere y’uko umunsi wa 18 urangira aho hateganyijwe indi mikino itatu ku munsi w’ejo. Dore uko Mukura ihagaze ku rutonde rwa shampiyona.
1. Kiyovu Sports 38
2. APR FC 37 (-1)
3. Mukura 32
Kiyovu ubu irayoboye mu gihe ikipe ya APR yo itarakina umukino wo ku munsi wa 18 izakina ejo n’ikipe ya Etincelles.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO