Mup-Gizzo umuhanzi ukizamuka utanga ikizere muri muzika Nyarwanda

Mup-Gizzo ni umuhanzi ukizamuka utanga ikizere mu muziki Nyarwanda. Uyu muhanzi akorera umuziki mu karere ka Huye mu ntara y’amajyepfo.

Ubwo Mup-Gizzo yaganiraga na Genesisbizz yatubwiye ko afite imyaka 20 y’amavuko ndetse ko yarangije kwiga amashuri y’isumbuye aho ubu ari kwitegura kuyakomereza muri kaminuza mu minsi ya vuba cyane.

Avuka mu muryango w’abana umunani(8) akaba ari umuhungu wa kabiri(2) mu bahungu (3) ndetse afite ababyeyi bombi.

Uyu muhanzi Mup-Gizzo aririmba mu njyana ya Afro Pop avuga ko kuririmba ari impano yavukanye akura abikunda cyane, aho yatangiye kuririmba byeruye mu mwaka wa 2018.

Uyu muhanzi umaze igihe gito mu muziki atangiye kuririmba, ubu amaze gusohora indirimbo (11) mu buryo bw’amajwi(audio) ndetse n’izindi ndirimbo (3) zirimo " "Inyota", " Iyo menya" na "Wagiye kare" zombi yazisohoye mu buryo bw’amashusho (video).

Yadutangarije ko mu ndirimbo zose yakoze imwe muri zo yitwa "Inyota" imaze gukundwa n’abatari bake aho yagiye abibonera ku bakunzi be uburyo bayakiriye n’ibitekerezo abo bakunzi be bamwoherereje bishima iyo ndirimbo ye.

Mup- Gizzo kandi yadutangarije ko ubu afite indirimbo nshya yise "Umubiri" ikoze mu buryo bw’amajwi yifashishijemo undi muririmbyi w’umuhanga witwa "King Giddy".

Iyi ndirimbo yakozwe na producer w’umuhanga witwa "Lazer Beat". Yagize ati: " iyi ndirimbo yanjye nshya ’Umubiri’ ndifuza ko yamvana ku rwego rumwe ikangeza ku rundi rwisumbuyeho".

Avuga ko ibyo azabifashwa n’itsinda ry’abakunzi be bitwa: "Intayoberana" aho asaba buri wese wumva bimuri ku mutima kumushyigikira kuba yaza mu muryango w’abakunzi be agafatanya n’abandi bakamushyigikira kuko ngo amarembo arafunguye.

Yagarutse ku mbogamizi abahanzi bakizamuka bakorera mu ntara bahura nazo. Yabivuze muri aya magambo ati: "umuziki wo mu ntara, imbogamizi uhura nazo ni ukubura abaterankunga(sponsors) bamwe bashobora gushora amafaranga mu muziki dukora".

Kuba ibihangano byabo bakora bidakundwa n’abantu baho nayo ni imbogamizi aho usanga umuntu atahamagara kuri radiyo ngo asabe indirimbo y’uwo muhanzi ahubwo ngo ugasanga ahamagaye yisabira indirimbo y’umuhanzi nka The Ben cyangwa Diamond. Ibyo bikaba ari bimwe mu bibaca intege.

Izindi nzitizi bagihura nazo ni ubushobozi bukiri buke avuga ko kubasha gukorana n’abahanzi bakomeye b’i Kigali bikiri ikibazo kubera cya kibazo cy’abaterankunga badahari, ati: "yewe ushobora gukorana indirimbo na Bruce Melody, iyo ndirimbo ntimenyekane kubera kubura ubushobozi bwo kuyimenyekanisha".

Ngo gukemuka kuri icyo kibazo rero birasaba abo bantu bafite amafaranga kuba batinyuka bagashora mu muziki wo mu ntara.

Asoza avuga ko inzu zo mu ntara zitunganya imiziki (studio) nazo zikiri hasi ku buryo ibihangano zasohora bidafite ubushobozi bwo guhangana nizo ziba zakorewe i Kigali.

Yakomeje agira ati usanga umuhanzi wo mu ntara azitiwe n’ibintu byinshi bituma adashobora guteza imbere impano ye.

Mup-Gizzo asoza asaba abantu bafite ubushobozi gushora amafaranga yabo mu muziki wo mu ntara by’umwihariko mu Majyepfo, abacuranzi (Producers) bakomeye b’i Kigali bakajya baza gukorana n’abahanzi bakizamuka bo mu ntara, ngo bizabafasha guhanganira ku isoko ry’umuziki n’ababahanzi b’i Kigali.


Uyu musore afite impano yo kuririmba

Reba amashusho y’indirimbo Inyota

Genesisbizz

Related Articles

Ibitekerezo

  • - Jean Bosco

    Wow! Uyu musore rwose turamwemera Sana, akomeze aduhe ibyiza natwe ntago tuzamutenguha

Igitekerezo cyawe kirashyirwaho aruko gisusumwe

TANGA IGITEKEREZO