Murangwa Eugene ntakozwa ibyo kongera umubare w’abanyamahanga muri shampiyona yo mu Rwanda

Murangwa Eugene wahoze ari umunyezamu w’ikipe ya Rayon Sports mbere ya Jenoside yakorewe Abatutsi muri Mata 1994, yahakanye yivuye inyuma ibyo kongera umubare w’abanyamahanga muri shampiyona y’u Rwanda kuko abaza ubu abona ntacyo baza gufasha abanyarwanda.

Ku wa Gatanu w’icyumweru gishize nibwo habaye inama nyunguranabitekerezo y’abanyamuryango ba FERWAFA, imwe mu ngingo zavuzweho ni ukongera umubare w’abanyamahanga bakava kuri 3 bakajya kuri 5.

Murangwa Eugene wahoze akinira Rayon Sports akaba no mu ishyirahamwe ry’abahoze bakinira ikipe y’igihugu Amavubi (FAPA) yahakanye yivuye inyuma iby’iki gitekerezo kuko abona atari cyo cyazahura umupira w’u Rwanda.

Mu butumwa yanyujije ku rukuta rwe rwa Instagram, yagiye ashyiraho amakipe yo mu Rwanda mu bihe bya kera bitandukanye abaza abantu abanyamahanga bari muri ayo makipe, hari mu rwego rwo kugaragaza ko abanyamahanga atari bo gisubizo k’umupira w’u Rwanda.

Yifashishije ifoto ya Rayon Sports yo mu 1989, yabajije abanyamahanga bari muri iyo kipe.

Ati"njye nageze muri Rayon Sports irimo abakinnyi b’abanyamahanga nka Hussein bitaga Karabi na Ndagano bitaga Rate aba bari bamwe mu bakinnyi bari bafite ijambo rikomeye mu ikipe haba muri bagenzi babo b’abakinnyi, mu bayobozi ndetse no mu bafana muri rusanjye, bari bakunzwe kandi bubahwa. Ibi byarakomeje mu bihe bya ba Lisala, Minko Michel, Aimee Dollars, Billy n’abandi baje nyuma yaho gato."

"Aha ndagira ngo nkwereke ko abanyamahanga b’icyo gihe bari batandukanye n’ab’iki gihe... uyu munsi biragoye kumva umunyamahanga ufite personality na character bimuhesha icyubahiro mu ikipe arimo cyane cyane ko n’uwaba abifite bitagaragara kuko atahamara kabiri! Again (ikindi) ibi byose ni byo bituma ntemera ko umubare w’abanyamahanga mwinshi haricyo ushobora kudufasha mw’iterambere rya ruhago yacu."

Yunzemo ati "abanyamahanga baza mu Rwanda uyu munsi ni abadafite izo fundamentals ubundi zikenewe k’umukinnyi uturuka hanze y’igihugu."
Yakomeje agaragaza ko kuri ubu umunyamahanga ukomeye mu karere mbere yo gutekereza kuza mu Rwanda atekereza mu bihugu by’ibituranyi, akaba ari kimwe mu bigaragaza ko shampiyona y’u Rwanda yasubiye inyuma.

Ati "kera abanyamahanga beza bazaga mu Rwanda bavaga i Goma, Bukavu, Burundi ndetse no bindi bice byo muri Kivu y’Amajyaruguru n’Amajyepfo, uyu munsi aba banyamahanga ntibaza mu Rwanda kubera impamvu nk’ebyiri; gusubira inyuma kwa shampiyona yacu n’impinduka z’imiterere y’umupira w’amaguru mu karere k’Ibiyaga Bigari. Ubu bisigaye byoroshye ko abakinnyi beza bo mu bice bya za Goma, Bukavu n’ahandi bajya gukina i Kinshasa cyangwa Lubumbashi kurusha uko byari bimeze mu myaka yashize. "

"Abakinnyi beza bava i Burundi aho kuza mu Rwanda bajya muri Tanzania, South Africa n’ahandi kure kurusha uko baza mu Rwanda, mu yandi magambo umubare w’abanyamahanga twifuza kongera uzatuzanira abadafite ubushobozi bwo kutugeza aho tuvuga twifuza kugera kandi igihe n’ikugera tuzabona ko twibeshye, tuzaba dutakaje indi myaka itagira ingano."

Abona ko hagashyizwe imbaraga mu iterambere ry’umupira w’amaguru haherewe mu bana kuko ari yo nkingi ya byose, kubaka inzego z’ubuyobozi mu makipe no muri federasiyo.

Ati "kubaka inzego z’ubuyobozi mu makipe no muri federasiyo, gushyiraho gahunda ifatika y’iterambere rishingiye ku makipe y’abana bato, ibi bikajyana no kubaka ibikorwaremezo n’ubushobozi bw’abatekinisiye(ibibuga, imipira, imyambaro, amahugurwa n’amarushanwa)."

Kugeza ubu Abanyamahanga bamaze kwemerwa ni 5 nyuma y’uko bavuye kuri 3 nkuko abayobozi b’amakipe bari bamaze kubisaba inshuro zitari nke.




Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO