Ihuriro ry’abahanzi mu Rwanda ryateguye igikorwa cy’ubukangurambaga mu bahanzi

Tariki 21 Kamena buri mwaka ni Umunsi Mpuzamahanga w’Umuziki kw’isi, uyu mwaka Ihuriro ry’Abahanzi ba Muzika mu Rwanda ryiyemeje gufata ukwezi k’ubukangurambaga ryise "Igihangano cyanjye umutungo wanjye, Impano yanjye ubukungu bwanjye!" mu rwego rwo gukomeza gufasha abahanzi kwiteza imbere.

Intore Tuyisenge uhagarariye Ihuriro ry’Abahanzi ba Muzika Nyarwanda (Rwandan Music Federation) yatangarije Genesisbizz/Tv ko uku kwezi kwahariwe umuziki bateguye ibikorwa byinshi bitandukanye bazafashirizamo abahanzi uko bakwiteza imbere babinyujije mu bukangurambaga bise “Igihangano cyanjye umutungo wanjye, Impano yanjye ubukungu bwanjye!"

Yakomeje agira ati “ Ubu bukangurambaga twatangije ni ugushishikariza abahanzi kwitabira kwiyandikisha mu ihuriro kugira dukomeze dushyire hamwe tuzabashe gutungwa n’ibihangano byacu kuko abishyize hamwe nta kibananira."

Tuyisenge yavuze ko muri uku kwezi bazakoramo ibikorwa byo kwereka abahanzi uko bagomba gusobanukirwa ibijyanye n’itegeko rirengera umutungo bwite mu by’ubwenge kuko rizabafasha kwiteza imbere mubyo bakora bikabereka uko babyaza umusaruro ibikorwa byabo.

Mu gusoza Tuyisenge Intore yifurije umunsi mwiza wa muzika abahanzi bose ndetse n’abakunzi bayo nubwo muri ibi bihe bitoroshye ngo babashe kubataramira nkuko byari bimeze mu myaka yashize kubera icyorezo cya Covid-19.

Abizeza ko muri uku kwezi ibikorwa byose bateguye bizaba mu buryo bw’ikoranabuhanga mu rwego rwo gukomeza kwirinda ikwirakwiza cya Covid-19.

Biteganyijwe ko ubwo ubu bukangurambaga buzaba bugeze ku musoza hazaba umuhango wo kumurika ku mugaragaro Rwandan Music Federation aho uzitabirwa n’abahanzi, Abanyamakuru n’abandi bafatanyabikorwa batandukanye, Mu rwego rwo kumenyekanisha andi mahuriro yose arigize.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO