Muyango, Urukerereza mu bazitabira igitaramo gisingiza intwari

Buri tariki ya 1 Gashyantare buri mwaka U Rwanda rwizihiza umunsi w’intwari, uzabimburirwa n’igitaramo cyatumiwemo abahanzi benshi barimo Muyango JMV, Masamba Intore, itorero ry’urukerereza n’abandi benshi.

Uyu munsi w’intwari usanzwe wizihizwa tariki ya 1 Gashyantare buri mwaka, Aho uwo muri uyu mwaka ufite intego igira iti:“UBUTWARI MU BANYARWANDA, AGACIRO KACU”.

Ibirori byo kwizihiza uyu munsi muri uyu mwaka wa 2020 uzabimburirwa n’icyumweru cy’Ubutwari cyatangiye ku wa Gatanu tariki 24 Mutarama 2020 gisozwe ku wa 31 uku kwezi.

Mu gusoza icyo cyumweru cy’ubutwari, hateganyijwe igitaramo gisingiza intwari kizitabirwa n’abahanzi bafite amazina azwi hano mu Rwanda.

Iki gitaramo kizitabirwa na Mariya Yohana, Intore Masamba, itorero ry’igihugu urukerereza, Muyango Jean Marie Vianney, Clarisse Karasira, Niyokwizerwa Bosco, ndetse na Social Mula.

Itorero ry’igihugu Urukerereza rizasusurutsa abazitabira igitaramo gisingiza intwari
Urwego rushinzwe Intwari z’Igihugu, Imidari n’Impeta by’Ishimwe (CHENO) ruvuga ko abana n’urubyiruko bahawe umwihariko mu bikorwa byo kwizihiza Umunsi w’Intwari z’u Rwanda mu rwego rwo kubatoza gukurana umuco w’Ubutwari mu byo bakora byose.

Ibi bikazagerwaho binyuze mu biganiro bizaca mu itangazamakuru, mu baturage no mu bigo bya Leta, Hakazaba kandi amarushanwa amenyerewe nk’Agaciro Tournament, azakorwa mu byiciro bitandukanye.

Iki cyumweru gizasozwa Ku wa 31 Mutarama 2020 mu gitaramo gisingiza Intwari z’Igihugu muri Camp Kigali kizitabirwa n’Abanyakigali n’abo mu nkengero zayo.

Intwari z’Igihugu zigabanyijwemo ibyiciro bitatu birimo Imanzi, Imena n’Ingenzi.

Mu cyiciro cy’Imanzi harimo Umusirikare utazwi ari yo ingabo ihagarariye izindi ngabo zitangiye igihugu zikagwa ku rugamba mu bihe byashize, iby’ubu n’ibizaza ndetse na Gen. Maj Fred Gisa Rwigema.

Izi ni zimwe mu ntwari z’U Rwanda

Mu cyiciro cy’Imena harimo Umwami Mutara wa III Rudahigwa, Rwagasana Michel, Uwilingiyimana Agathe, Niyitegeka Felicité n’abanyeshuri b’i Nyange.

Kugeza ubu mu cyiciro cy’Ingenzi nta ntwari zari zashyirwamo, aho ngo hagikorwa ubushakashatsi.

Iki gitaramo giteganyijwe kuba kuri uyu Gatanu kizatangira ku isaha ya saa kumi nimwe n’igice z’umugoroba, Kibere kuri Camp Kigali, aho kwinjira bizaba ari ubuntu.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO