My Soulmate EP 14:Ukuri guca mu ziko ntigushya!nasohotse muri gereza umukunzi wanjye bimwanga mu nda ankorera ikintu kidasanzwe imbere y’ababyeyi be

Twaherukanaga umugambi wo gufungisha Yvan upfubanye ababyeyi ba Guinette dore ko uwo bari bahungiyeho ngo abafashe gucura ibyangombwa bihimbano bagize umwaku bagasanga yiganye na Yvan ndetse bituma bananirwa kugera ku ntego yabo yo kumuheza mu buroko azira gufata ku ngufu.

Nyuma y’uko habuze ibimenyetso bishinja Yvan byabaye ngombwa ko hafatwa umwanzuro wo kumufungura maze ajya kwakirwa n’umukunzi we ndetse iki gihe ababyeyi ba Guinette nabo bafashe iyambere ngo bajye kureba umuhungu wabateshereje umutwe umukobwa wabo akamwihambiraho bigatuma amusaza dore ko batari baraciye iryera Yvan na Mbere hose kuko bamufataga nk’umusore uciriritse.


Yvan ubwo yari mu buroko yahise abwirwa ko afunguwe kuko ngo nta bimenyetso bimushinja

Yvan yari muri gereza maze agiye kumva yumva abwiwe ko arekuwe kuko nta bimenyetso bimushinja bihari ndetse ubwo yasohorwaga yatunguwe no kubona hari ababyeyi bamureba nk’icyo imbwa ihaze ariko nanone bari kumwe n’umukunzi wari waje kumwakira kuko avuye muri gereza ndetse ubwo yageragezaga gusuhuza ababyeyi ba Guinette ngo abereke ko nta kibazo bafitanye bo bahise barengwa n’umujinya maze banga no kumuha ikiganza aho bamweretse agasuzuguro kadasanzwe ariko ntiyabyitaho.

Ubwo Guinette yabonaga bamusuzuguriye umukunzi we yahise afata umwanzuro kugirango amurwanire ishyaka rikomeye ,maze ahita aza yiruka barahoberana ubutarekurana ndetse mu buryo butangaje kandi butunguranye Guinette yahise asomana na Yvan maze akomeza abwira ababyeyi be agira ati:Babyeyi banjye ndabakunda cyane ariko murabizi ko mudakwiye kumpitiramo uwo nkunda ndetse n’uburyo nzabana nawe icyambere murabizi ko nsigaje imyaka mike nanjye nkajya kubaka urugo rwanjye rero ndabinginze nimuduhe umutuzo twikundanire urukundo dukundana rufite ibanga rikomeye cyane kandi turakundana bihamye kuko twahujwe n’Imana yo mu ijuru.

Ubwo Guinette yavugaga aya magambo Mama we yabaga yarakaye cyane maze akamubwira ati:Kandi wa mukobwa we uzabona ishyano mu gihe wananiwe kudutega amatwi ndetse ukaba utacyumvira Papa wawe ese ubona muri twebwe hari ukwanga?


Guinette yakomeje gusobanurira mama we ko ibyo kumwangisha Yvan atabikozwa ndetse ibi byatumaga Yvan yicinya icyara.

Guinette yakomeje gusobanurira mama we ko ibyo amubwira atarimo kubikozwa gusa Yvan we yumvaga ari umunyenga kubona umwana ukomoka mu muryango ukomeye ahitamo kumukunda kandi akamwitangira bikomeye ndetse agakomeza kumwereka ko bari kumwe haba mu bibi ndetse no mu byiza nyamara Papa wa Guinette yari yariye karungu kuburyo yari afite umujinya udasanzwe maze ako kanya yahise agira ati:Wa gakobwa ubwo ntaragukosora ntabwo ujya wumva nta nisoni uratinyuka ugakomeza ukavumvura ese ubundi aka gahungu kaguhaye iki gituma uhora warabayer nk’umusazi?

Guinette yahise abwira umubyeyi we ati: Data rwose ukwiye kuba warabonye imbaraga ziri mu rukundo rwacu ndetse ukirinda kutuvangira kandi rwose sigaho wikomeza gutuka umukunzi wanjye dore ntabwo yigeze yifuza kukujyana mu butabera ko wamufungishije kandi arengana.

Nyamara ibi byose byavugwaga aba bose bahagaze imbere ya gereza Yvan yari afungiyemo dore ko yari ategereje gusinya ko arekuwe gusa Guinette n’ababyeyi be bakomeje gusigana bapfa Yvan ndetse ntabwo byari byoroshye kuko n’abandi bantu bakomezaga kwibaza ku mubano w’aba bombi dore ko bari bafitanye urukundo ruhanitse kandi rudasanzwe.

Papa wa guinette yagerageje kumukubita urushyi maze Yvan aritambika aba ariwe urukubitwa ariko aharanira ko umukunzi we atababazwa kandi yakomeje kumurwanira ishyaka.

Papa wa Guinette yakomeje kuganzwa n’uburakari maze ashaka kujya gukubita urushyi umukobwa we ngo amuhoye ko yakomeje gutakagiza uwo yitaga umukunzi we nyamara ubwo yageragezaga gushaka kumukubita urushyi Yvan yahise aza yiruka nk’iya Gatera maze ahita yitambika akura mu nzira umukunzi we maze urushyi yari agiye gukubitwa rufata Yvan ndetse aka kanya buri umwe yahise atangarira urukundo ruri hagati y’aba bombi kubona buri umwe yitangira undi bene aka kageni.

Ababyeyi ba Guinette bahise bikubura barataha ndetse Yvan asigara yahoberanye n’umukunzi we aho bari imbere ya gereza bagitegereje ko abacunga gereza bemerera Yvan gusinya agataha byemewe.

Ese urabona nyuma yo gufungurwa kwa Yvan bizagenda gute ko urukundo rwe na Guinette rudahungabanywa n’umuyaga?

Ntuzacikwe na My Soulmate EP 15.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO