New Zealand: Umuzungu wishe Abasilamu 51 abarashe yajuriye igihano yahawe cyo gufungwa ubuzima bwe bwose

Umuzungu ugendera ku matwara y’irondaruhu yaje no kumugeza ku kwivugana Abasilamu 51 mu musigiti basengeragamo i Christchurch yajuririye igihano yahawe cyo gufungwa ubuzima bwe bwose asigaje.

Iri sanganya ryabaye mu kwezi kwa Werurwe 2019 ubwo Brenton Tarrant yarasaga abasilamu 51 akagerageza no kwica abandi 40 basengeraga mu misigiti iherereye i Christchurch muri New Zealand.

Ni ubwicanyi uyu mugabo yakoze mu buryo byagaragaraga ko yishimiye cyane aho yaje yambaye imyenda ya gisirikare ndetse ibyo yakoraga byatambukaga kuri murandasi mu buryo bw’ako kanya abinyujije ku byuma bifata amashusho yari yambaye ku mutwe.

Uyu mugabo yinjiye mu musigiti atangira kurasa atarobanuye abasilamu bose bari bakoraniye mu isengesho ryo ku wa gatanu (gusali Idjuma) abamishamo urufaya rw’amasasu.

Abenshi muri aba bazungu babiterwa n’icyitwa White Supremacy imyumvire ivuga ko abazungu bafite uruhu rwera ko aribo bwoko bwa mbere bukwiye kuyobora ubundi. Rimwe na rimwe harigihe habaho no kwica abo badahuje ubwoko kuko baba babona ntacyo bamaze cyangwa baraje kwigarurira ubutaka bwabo.

Ibi byaje gutuma mu 2020, Brenton asabirwa gufungwa burundu y’umwihariko ndetse nibwo bwa mbere byari bibayeho mu mateka ya New Zealand.

Nyirubwite yakomeje kwerekana ko atanyuzwe n’imyanzuro urukiko rwamufatiye maze mu kwezi k’Ugushyingo mu 2021 asaba uwari umwunganizi we mu mategeko, Tony Ellis ko bajurira.

Inkuru dukesha Reuters ivuga ko kuri uyu wa kabiri Ellis yatangaje ko atacyunganira uyu mugabo, gusa aracyatsimbaraye ku mugambi wo kujurira igihano yahawe.

Brenton Tarrant wishe abasilamu 51 arifuza kujurira igihano yahawe

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO