Niyubahwe uba Finland nyuma yo kwihugura yatangiye gukora umuziki Kinyamwuga

Umunyarwanda Benjamin Niyubahwe ubarizwa muri Finland nyuma yo kwihugura avuga ko yatangiye gukora umuziki kinyamwuga ahereye ku ndirimbo yise ‘Ingabire’ ifite amashusho anogeye ijisho.

Uyu musore w’imyaka 22, yatangiye umuziki akiri ingimbi kuko kuva ku myaka 13 y’amavuko yaririmbaga muri korari y’abana ubwo yari akiri mu Rwanda.

Akimara kwimukira muri Finland n’ubundi yakomeje gukora umuziki ariko yishimisha nyuma aza kujya kuwihuguramo ndetse no kuwutunganya, ubu ari kuwukora mu buryo bw’umwuga.
Benjamin ubu unafite inzu itunganya umuziki Ben Records muri kiriya gihugu, yashyize hanze indirimbo ye yanakorewe muri iyi studio.

Iyi ndirimbo yise Ingabire, yuzuye amagambo y’urukundo aririmbamo abwira umukobwa ko azamukunda bigashyira kera.

Aba aririmba ati “Mbwiza ukuri ko ntarimo kurota, nyizeza ko nijoro tuzaba turi kumwe icyizere cy’umunezero wanjye ni wowe iyo undeba unsekera bimvura amavunane komeza komeza komeza unkunde nanjye sinzarekera…”

Uyu musore ukomeza aririmba ko umukobwa bakundana ari yo mvura y’imigisha, hari aho avugamo ko uwo mutarutwa we ari we ukwiye urufunguzo rw’umutima we ndetse ko na we yamaze kumwiyegurira.

Benjamin avuga ko yahisemo kuririmba mu njyana ya R&B kuko ari yo asanzwe yiyumvamo kandi akaba anayikunda.

Uretse amagambo y’urukundo asize umunyu yumvikana muri iyi ndirimbo yasohokanye na video, irimo amashusho anogeye ijisho kubera ubwiza n’ikimero cy’umukobwa uteye ukwe ugaragara muri aya mashusho.

Ni amashusho kandi yafatiwe ahantu nyaburanga nko mu busitani butoshye, hakaba hari n’ikirere gisa neza.

Iyi video kandi igaragaramo ubuhanga kuko harimo amashusho yafatiwe mu kirere n’utudege tutagira abapilote tuzwi nka drones.


Niyubahwe avuga ko nyuma yo kwihugura agiye kujya akora umuziki kinyamwuga

Amashusho y’indirimbo yise Ingabire

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO