Nka kimwe mu bishingiye ku muco, ubudehe bwahinduye imibereho y’abaturage

ubudehe nka kimwe mu bikorwa byahinduye imibereho y’Abanyarwanda bishingiye ku muco, bwabafashije abatuye I Karongi gushyira hawe imbaraga biteza imbere.

Buri gihugu kigira umuco ukiranga ukagitandukanya n’ibindi. Umuco ugira uruhare runini mu mibereho n’iterambere ry’abagituye. Kugira ngo Abanyarwanda bumve intera zitandukanye z’iterambere bazigire izabo kandi biborohere kuzigeraho ni ngombwa ko zitegurwa zishingiye ku muco.

Mu Rwanda hari ibikorwa byahinduye imibereho y’Abanyarwanda bishingiye ku muco: imihigo, Gira inka Munyarwanda, Ubudehe, Umuganda, Umugoroba w’Ababyeyi, Umushyikirano, Umwiherero w’abayobozi, Abunzi, Inkiko Gacaca...
Ubudehe ni gahunda ya Leta yashyizeho hagamije ko abaturage bashyira imbaraga hamwe bakarushaho gukorana nta nkunga ivuye hanze bategereje, bagamije kwiteza imbere aho ubushobozi bubaye buke leta ikabunganira.

Abaturage bo mu Karere ka karongi mu Murenge wa Rubengera, bemeza ko ubudehe bwabafashije gushyira hamwe imbaraga babasha kwigezaho ibikorwa by’iterambere birimo umuriro w’amashanyarazi, amazi, no kubaka amavuriro aciriritse.

Ubudehe kandi bwatumye abaturage barushaho kunga ubumwe kuko ibyo bikorwa bikorwa nta vangura iryo ari ryo ryose ndetse burushaho gutuma abaturage bibona mu Bayobozi kuko baganirira hamwe ibigamije gukorwa kandi impande zombi zikabigiramo uruhare.

Mu murenge wa Rubengera mu Karere ka Karongi, abaturage baganiriye n’Abayobozi bumvikana ku byo bakora muri gahunda y’ubudehe, maze Ubuyobozi bubagenera inkunga yabafashije kwigeza ku bikorwa bitandukanye.

Mu Kagari ka Nyarugenge, abaturage bo mu Mudugudu wa Rukaragata babashije kwikururira umuriro w’amashanyarazi, bavuga ko byakozwe begeranyije ubushobozi nta kurebanaho aho umwe aturuka ahubwo ari uko baturanye begeranye kandi ubudehe bukaba bubahurije hamwe.

“Ubudehe bwatumye twicarana n’ubuyobozi maze twungurana inama ku cyakorwa kihutirwa dusanga amashanyarazi ari yo akenewe cyane, maze abaturage tuzana uruhare rwacu Leta iratwunganira ubu rero turacana kandi amashanyarazi atuma turushaho kwiteza imbere”.Nyirarukundo Marry.

Silikare Jean Bernard avuga ko amashanyarazi bakesha ukwishyira hamwe mu budehe arushaho kubaka ubumwe kuko ubushobozi babukusanya nta vangura ahubwo bikorwa uko abaturage baturanye ibyo bikabaha amahirwe angana mu kwishakamo ibisubizo. “Kera wasangaga amashanyarazi ajyanwa ku muntu uzwi, ariko ubu twese dushyira hamwe tukayazana tugacanira hamwe, ibyo birushaho kubaka ubumwe bw’abaturage kuko imbaraga baba bazishyize hamwe ntawe usigaye”.

Umunyamabanga nshingwabikorwa w’Umurenge wa Rubengera Rukesha avuga ko ubudehe butuma abaturage bibona mu Buyobozi kuko baba bumvikanye ibyo bakeneye bigashyirwa mu bikorwa ntawe ubangamiye undi bitandukanye na mbere ubwo ubuyobozi bwatekererezaga abaturage gusa cyangwa bantu bamwe akaba ari bo bahabwa ijambo mu gikorwa runaka.

Yagize ati “Kubera ubudehe, abaturage bamaze gusobanukirwa n’uruhare rwabo mu gufata ibyemezo bigamije iterambere, ubudehe kandi bwatumye Ubuyobozi bubasha kwegerana n’abaturage no guha agaciro ibyifuzo byabo kandi bufasha ubuyobozi kumenya ahari ikibazo cyangwa ahakenewe imbaraga nyinshi bigakorwa ku nyungu za benshi nta kuzishyira ahantu hamwe”.

Bimwe mu bikorwa byibandwaho mu budehe hagamijwe iterambere n’ubumwe harimo imihanda iciriritse, amashanyarazi, amazi meza, amavuriro acirirtse, n’ibindi bikorwa bifitiye abaturage akamaro byose bigakorwa babigizeo uruhare.


Abaturage bo mu Mudugudu wa Rukaragata, mu Kagari ka Nyarugenge mu Murenge wa Rubengera bashimira ibyiza byo gukorera hamwe.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO