Nubwo ruryana urusenda n’abantu ni urukundo rumaze imyaka ibihumbi kandi ntirucogora

Umwaka ushize, abaganga muri Amerika bashatse gutabara umugabo wari ugejejwe kwa muganga ababara umutwe bidasanzwe, yishimagura ku ijosi kandi afite isesemi ikabije ariko ataruka.

Bamucishije mu cyuma (CT scan) bapima inkari n’umuvuduko w’amaraso bagera ku mwanzuro ko - nta burozi yari yariye cyangwa arwaye indi ndwara, ahubwo yari yariye rumwe mu nsenda zikarishye cyane ku isi.

Urusenda (ipilipili) uyu mugabo w’imyaka 34 yari yariye rwitwa "Carolina Reaper" bivugwa ko rukaze inshuro 275 ku rusenda rusanzwe.

Yagize amahirwe abaganga babasha kumufasha kuko ubwonko bwari bwagize ikibazo maze arakira neza.

Uru rushobora kuba ari urugero rukomeye cyane kuri miliyoni nyinshi - niba atari za miliyari - z’abantu batabura urusenda ku ifunguro ryabo.

Nyamara urusenda rutuma bokerwa ku rurimi bagashaka ikintu banywa cyangwa bakanaribwa munda - ariko se kuki bakomeza?

Urusenda n’abantu ni urukundo rumaze imyaka ibihumbi kandi ntirucogora - umusaruro w’urusenda ku isi wavuye kuri toni miliyoni 27 ugera kuri toni miliyoni 37 hagati ya 2017 na 2018.

Mu Burundi no mu Rwanda hari benshi batabura urusenda (ipilipili) ku ifunguro ryabo, hari abarutegurana ibirungo ngo ruryohe kurushaho, hari n’abarurya inyotse cyangwa ari rubisi.

Muri Turkiya abantu barya urusenda ku kigereranyo cya garama 86,5 ku munsi - nibo baza imbere y’ibindi bihugu, bagakurikirwa na Mexique (50g ku munsi) izwiho kurunga ibiryo n’urusenda rwinshi.

None se kuki dukunda ibi bintu bitwokera?

Ntibyoroshye kumenya imitekerereze ya muntu imutera gukunda agasenda, byahereye cyera cyane ku buryo bigoye no kumenya aho byatangiriye. Abahanga bakomeje kugerageza gusobanukirwa.

Urusenda rwifitemo ikinyabutabire kitwa ’capsaicin’ kirutera gukara no kocyera umuntu yumva iyo aruriye.

Abahanga bavuga ko ikimera cy’urusenda gifite ubu bukana nk’uburyo bwo kukirinda inyamaswa (n’abantu barimo) kukirya.

Gusa inyoni ibyo ntibizireba

Abashakashatsi muri kaminuza ya Arizona muri Amerika bavumbuye ko urwungano ngogozi rw’inyoni ntacyo imbuto cyangwa ibishishwa by’urusenda bizikoraho na busa.

Hari ibivugwa ko abantu bakunda urusenda n’ibindi biribwa byokera kuko byifitemo kurwanya za ’bacteria’ mbi mu muntu kandi rufasha umubiri kuringaniza igipimo cy’ubushyuhe.

Abahanga basuzumye amoko anyuranye y’insenda mu bihugu 36 ku isi basanga abantu barya urusenda cyane ari abo mu bihugu bishyuha cyane.

Mu mwanzuro wabo bagira bati: "Mu bihugu bishyuha, nibura buri funguro ry’inyama riba ririho urusenda, mu bihugu bidashyuha hari amafunguro amwe n’amwe agomba kuba ariho agasenda".

Mu bihugu nka Thailand, Philippines, Ubuhinde na Malaysia biri mu bya mbere ababituye barya urusenda cyane, mu gihe Sweden, Finland na Norvege biza inyuma ku rutonde.

Umuhanga mu bumenyi bw’ibiribwa Kaori O’Connor we asobanura ko kimwe n’ibisheke n’ibirayi, urusenda narwo rwari ikiribwa kitazwi mu myaka amagana mu Burayi.

Gusa ngo kuva abantu ba mbere bavuye i Burayi bageze muri Amerika na Aziya mu bya mbere bagarukanye harimo urusenda.

Paul Rozin umwarimu muri kaminuza ya Pennsylvania muri Amerika avuga ko yagize iki gitekerezo abonye ko hari abantu benshi cyane batarya urusenda.

Yafashe abantu banyuranye abaha insenda zitandukanye kandi zikarishye kugeza ku zo badashobora kwihanganira uburibwe.

Maze agenda abaza buri umwe urwo yakunze kurusha izindi. Abenshi bagiye basubiza ko urwo bakunze ari urukaze kurusha izindi babashije kwihanganira.
Bwana Rozin ati: "Abantu nizo nyamaswa zonyine zishimira ibintu bitari byiza muri karemano yabyo.

"Ubwonko bwacu bwamenyerejwe kumva ko nta kibazo nubwo bwose umubiri wacu waba uvuga ibitandukanye."

Abahanga bakomeje gushaka no kumenya impamvu hari abakunda urusenda cyane kurusha abandi, Nadia Byrnes umuhanga mu mirire avuga hari abagabo n’abagore hari itandukaniro ku rusenda.

Nadia avuga ko yasanze abagabo aribo cyane cyane barufata bashaka kwemeza abandi ko barya urukaze cyane kurusha abandi.

Ati: "Urugero nko muri Mexique, kurya urusenda abagabo babihuza n’imbaraga, gutinyuka, no kugira imbaraga mu mibonano mpuzabitsina".

Ibivugwa na siyansi n’abantu ku giti cyabo ku rusenda ni byinshi, ariko ikizwi neza ni uko abantu batazahagarika kurushyira ku mafunguro yabo.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO