Nyuma y’isabukuru y’imyaka 25, Rehoboth ministries iteye indi ntabwe ikwiye

Rehoboth minsistries yizihije isabukuru y’imyaka 25 imaze itangiye umurimo w’ivugabutumwa, mu gitaramo cy’ubudasa cyabeye mu itorero rya Restoration Church ku Kimisagagara ari naho yatangiriye.

Ni igitaramo cyaranzwe n’amashimwe agaruka ku mirimo ihambaye Imana yakoresheje abagize iri tsinda mu rugendo rutari rworoshye ariko rwashibumo imigisha itarondoreka, igiye no gutuma iri tsinda ryiyubakira ahantu habo bwite hazajya hifashishwa mu kuramya Imana (Worship Center).

Iyi sabukuru yabaye kuri uyu wa 22 Ukuboza 2019, Rehoboth Ministries yafatanije n’amatsinda nka Alarm Ministries na Shekinah, mu gitaramo cyagaragayemo ubwiza bw’Imana.

Ubuyobozi bwa Rehoboth Ministries bwagarutse ku mavu n’amavuko y’uyu muryango n’inzira wanyuzemo mu gihe y’imyaka 25 kugirangingo ube ugeze aho uri kugeza ubu.

Patrick Munini ni umuyobozi w’uyu muryango, yabwiye abitabiriye iki gitaramo ibyaranze amateka yabo mu myaka 25 ishize.

Munini yagaragaje ko mu minsi ya vuba mu byo bitegura gukora, harimo kubaka ahantu habo ho kuramiriza Imana, “Rehoboth Worship Center”, umushinga uzashyirwa mu bikorwa mu gihe cya vuba.

Rehoboth Ministries yatangiye ivugabutumwa ryo mu ndirimbo mu Ukwakira 1994, yabarizwaga Kimisagara muri Restoration Church.

Rehoboth Ministries ubwo yatangiraga yari korali isanzwe yo mu rusengero ariko itagira izina. Nyuma y’igihe gito yaje kwitwa Rehoboth Choir.

Nyuma yo guhindura icyerekezo na gahunda zayo yahinduye izina yitwa Rehoboth Ministries icyo gihe yari ikiri muri Restoration Church Kimisagara.

Imaze kuba Ministry kubera icyerekezo na gahunda birenze urwego rw’urusengero rusanzwe byatumye yakira n’abandi banyamuryango benshi bava mu matorero atandukanye atakiri Restoration Church gusa.

Kugeza ubu Rehoboth Ministries ifite abanyamuryango hafi 80, bamwe muri bo babarizwa mu Rwanda abandi bari ku migabane yose y’Isi.

Muri Rehoboth Ministries hanyuzemo abakozi b’Imana batandukanye ndetse yanagize uruhare rukomeye mu kuzamura impano z’abahanzi baririmba indirimbo zo kuramya no guhimbaza Imana.

Aba bahanzi barimo Liliane Kabaganza, ndetse na Romulus Rushimisha ukorera umuziki muri Leta Zunze Ubumwe za Amerika n’abandi benshi.

Rehoboth Ministries yamenyekanye cyane mu ndirimbo nka Ur’uwigitangaza, ku musaraba, uri mwiza n’izindi.


Genesisbizz

Related Articles

TANGA IGITEKEREZO