Nyuma yo kwirukanwa ku mbuga, Trump agiye gufungura urwe ruzahuza abantu benshi

Ku wa gatatu dusoje nibwo Donald Trump wabaye perezida wa 45 wa Leta zunze ubumwe za Amerika yatangaje ko ari mu bikorwa bizatuma agarukana imbaraga ku mbuga nkoranyambaga nyuma y’uko ahagaritswe burundu kuri zimwe mu mbuga nkoranyambaga yakoreshaga.

Amakuru dukesha urubuga rwa ’Bloomberg’ avuga ko Donald Trump ari mu myiteguro yo gushyira hanze urubuga nkoranyambaga ruzahuza abantu benshi ku buryo mu mezi ya mbere y’intangiriro y’umwaka wa 2022 ruzaba rwamaze kujya hanze.

Amakuru yatangajwe na ’The Trump Media and Technology Group’ avuga ko uru rubuga ruhuza abantu benshi bazarwita Truth Social.

Donald Trump agaragaye ashaka gushyiraho urubuga nkoranyambaga rwe nyuma y’aho konti ze yakoreshaga kuri Twitter na Facebook zahagaritswe.

Donald Trump konti ze zarafunzwe ku mbuga nkoranyambaga nyinshi yakoreshaga nyuma y’uko zamushinje kugumura abaturage bikageza ubwo bateye ingoro y’inteko ishingamategeko ya Leta zunze ubumwe za Amerika (Capitol), Ibi byabaye ku wa 06 Mutarama 2021 aho abaturage bigaragambyaga nyuma y’uko umukandida wabo, Trump bari bashyigikiye yari yatsinzwe amatora na Joe Biden.

Urubuga rwa Twitter rwahagaritse burundu konti ya Donald Trump naho urubuga rwa Facebook rwatangaje ko konti y’uyu mugabo yahagaritswe imyaka ibiri (2) , Ubwo ni ukugera mu mwaka wa 2023 ariko nabwo batangaje ko bazongera kumukomorera ari uko babona ibyago yateza kuri rubanda igihe yagaruka kuri Facebook bizaba byaragabanutse.

Kubaho ubuzima adakoresha imbuga nkoranyambaga, Donald Trump yatangaje ko byamusubije inyuma ndetse bimubuza gutangaza ibyo yifuza nk’igihe yari agikoresha imbuga nkoranyambaga nka Twitter kuko ariho yakundaga gutangariza ibintu byinshi.

Donald Trump yakunze gukora ibikorwa byinshi byerekana ko ashobora kuzongera kwiyamamaza mu matora y’umukuru w’igihugu ateganyijwe mu 2024 n’ubwo atigeze yerura.

Kuba yakwiyamamaza adakoresha imbuga nkoranyambaga bishobora kumubera imbogamizi kuko atakumvwa na benshi, Ibi nibyo byatumye yiyemeza gushyiraho urubuga nkoranyambaga rwe bwite azita Truth Social.


Trump yiyemeje gufungura urubuga nkoranyambaga rwe bwite ruzajya ruhuza abantu benshi.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO