Pape Diouf wayoboye Ikipe ya Marseille yapfuye

Uwahoze ari Perezida wa Olympique de Marseille, Pape Diouf, yapfuye azize icyorezo cya Coronavirus cyugarije Isi muri iki gihe.

Iyi nkuru yamenyekanye kuri uyu wa kabiri bitangajwe n’abo mu muryango. Urupfu rwe rwemejwe na RTS, umuyoboro wa televiziyo rusange muri Senegali.

Pape Diouf yagombaga kuvanwa i Dakar akajya i Nice mu Bufaransa n’indege y’ubuvuzi ariko ubuzima bukomeza kumucika, ntiyashobora guhaguruka apfira ku butaka bwa Senegali.

Yari mu bitaro i Dakar kubera Coronavirus ari naho yafashwaga guhumeka hifashishijwe ibikoresho byabugenewe.

Bivugwa ko Diouf yatangiye kuremba ku wa Gatandatu w’icyumweru gishize, abaganga batangira kumwitaho bamufasha mu buryo bumworohereza guhumeka ahanganiye ubuzima bwe n’indwara ya Covid-19 byarangiye ibumuvukije.

Kugeza ubu, kuri uyu wa kabiri, Senegali uyu mugabo akomokamo imaze kubarura abantu 175 barwaye Covid-19 barimo 135 barimo kuvurwa mu gihe 40 bakize.

Uyu mugabo wanigeze kuba umunyamakuru, yamenyekanye cyane nka Perezida w’ikipe yo muri Shampiyona ya Ligue 1 mu Bufaransa mu ikipe ya Marseille hagati ya 2005 na 2009, mbere y’uko asimburwa na Jean-Claude Dassier.


Pape Diouf yapfuye azize Coronavirus

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO