Patient yahagaritse kujya mu Buholandi n’igitaramo cyo kuri Pasika

Patient Bizimana ukora indirimbo zihimbaza Imana ’Gospel’,yamaze guhagarika urugendo rwo kujya mu Buholandi, ahagarika n’igitaramo asanzwe akora buri mwaka kuri pasika kizwi nka “Easter Celebration” kubera icyorezo cya Coronavirusi gikomeje kuyogoza isi.

Iki cyorezo cya Coronavirusi cyakomye mu nkokora ibikorwa by’umuhanzi Patient Bizimana, cyatangiriye mu ntara ya WUHAN mu gihugu cy’ubushinwa mu mpera za 2019. Leta y’u Rwanda ikaba yaratangaje umuntu wa mbere wakigaragaweho kuwa 14 Werurwe 2020 bikurikirwa n’ingamba zikomeye zashyizweho hagamijwe kwirinda no gukumira iki cyorezo.

Uyu muhanzi umaze gushinga imizi mu ndirimbo zo kuramya no guhimbaza Imana, Patient Bizimana, yari yatumiwe mu gitaramo mu Buholandi yagombaga guhuriramo n’umuhanzi w’Umurundi Fortran Bigirimana uba i Burayi.
Bigirimana yakunzwe mu Rwanda binyuze mu ndirimbo zirimo “Ntaco Nzoba”, ‘‘Ni amahoro” n’izindi.

Iki gitaramo cyiswe “Thanksgiving Celebration Live Concert” ,cyari giteganijwe kubera Kerkplein1 mu Buholandi ku wa 4-5 Mata 2020. Cyateguwe na Family Fellowship Ministries, Kuri ubu abagitegura bakaba bagisubitse nk’uko bitangazwa na Patient Bizimana wari wagitumiwemo.

Mu itangazo rigenewe abanyamakuru ryashyizwe ahagaragara kuri uyu wa 16 Werurwe 2020, n’ikigo Moriah Entertainment Group, rivuga ko ‘Easter Celebration 2020’ ihagaritswe kubera impamvu z’icyorezo cya Coronavirusi.

Rigira riti “Nkuko igihugu cyacu cyashyizeho ingamba zo kwirinda icyorezo cya Coronavirusi (COVID-19), igitaramo cya ‘Easter Celebration 2020’ gitegurwa n’umuhanzi Patient Bizimana cyari giteganijwe kuri Pasika tariki ya 12 Mata 2020 cyahagaritswe hagendewe ku mabwiriza y’umugi wa Kigali ajyanye no guhagarika ibikorwa bihuza abantu benshi hagamijwe kwirinda icyorezo cya Coronavirusi.”

‘Easter Celebration” ni igitaramo ngarukamwaka gitegurwa n’umuhanzi Patient Bizimana, kigahuriza hamwe abakristo, abaramyi n’abahanzi baririmba indirimbo zo kuramya no guhimbaza Imana baba ab’imbere mu gihugu, mu karere ndetse no ku rwego mpuzamahanga hagamijwe kwizihiza izuka rya Yesu Kristo. Ni igitaramo gikorwa ku munsi wa Pasika nyir’izina.

Kuva muri 2015 iki gitaramo gitangira bwa mbere, kitabiriwe na bamwe mu bahanzi b’amazina akomeye mu muziki wo kuramya no guhimbaza Imana barimo FORTRAN na DUDU bo mu Burundi, PST SOLLY MAHLANGU wo muri Afurika y’Epfo wakitabiriye muri 2016, MARION SHAKO wo muri Kenya na APOLLINAIRE wo mu Burundi bakitabiriye muri 2017.

SINACH wo muri Nigeria yakitabiriye muri 2018, ALKA MBUMBA wo muri Repubulika iharanira Demokarasi ya Congo wakitabiriye muri 2019 ndetse n’abandi baramyi b’abanyempano b’imbere mu gihugu barimo AIME UWIMANA , ISRAEL MBONYI, SIMON KABERA n’abandi.

Iri tangazo rikomeza rivuga ko bahagaritse igitaramo cy’uyu mwaka, bakaba bagiye gutegura icy’umwaka utaha wa 2021 bavuga ko ku bw’ubuntu bw’Imana kizaba kimeze neza.

Patient Bizimana yatangiye umuziki akiri muto, agitangira kwiyumvamo impano yatangiye kwihatira kwiga gucuranga piano mu rusengero hanyuma bigeze mu 2007 asohora indirimbo ye bwite yitwa ‘Andyohera’ ari nabwo benshi batangiye kumubwira ko afite ijwi ryiza. Yakunzwe cyane mu ndirimbo nka ‘Iyo neza’, ‘Amagambo yanjye’, ‘Menye neza’, ‘Andyohera’ n’izindi.


Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO