Perezida wa FIFA yafunguye icyicaro gishya cyabo i Kigali

Mu gitondo cyo kuri uyu wa gatanu Perezida wa FIFA Gianno Infatino yafunguye ku mugaragaro icyicaro cy’ ibiro bya FIFA i Kigali.

Uyu muhango witabiriwe na Minisitiri w’Ububanyi n’Amahanga, Dr Vincent Biruta hamwe na Minisitiri wa Siporo, Aurore Mimosa Munyangaju ndetse n’abandi bayobozi batandukanye bafite aho bahuriye n’umupira w’amaguru ndetse n’indi mikino itandukanye hano mu Rwanda.

Icyicaro cya FIFA cyo mu karere (FIFA Regional Development Office) kizaba gishinzwe ibihugu byo muri Afurika y’Iburasirazuba cyatashywe kuri uyu munsi, kizajya gikorera mu nzu nshya ya I&M Bank iherereye mu mujyi wa Kigali.

Kizaba gifite inshingano zikomeye zo guteza imbere umukino w’umupira w’amakuru mu karere k’Afurika y’iburasirazuba nkuko byagiye bisubirwamo na bayobozi bari bitabiriye uwo muhango .

Minisitiri w’Ububanyi n’Amahanga, Dr Vincent Biruta niwe wasinye amasezerano y’u Rwanda na FIFA yo kugira iki cyicaro i Kigali.

Mu ijambo rye yashimiye byimazeyo Umuyobozi wa FIFA Bwana Gianno Infatino ndetse anashimira ishyirahamwe ry’umupira w’amaguru kw’isi kuba ryagiriye icyizere igihugu cyacu bakahashyira icyicaro.

Yamwijeje ko Guverinoma y’U Rwanda nayo izakora uko ishoboye kugira ngo bazagere ku nshingano bifuza gukorera uwo mukino mu karere by’umwihariko mu Rwanda.

Perezida wa FIFA, Gianni Infantino nawe yashimiye Guverinoma y’u Rwanda by’umwihariko Nyakubahwa Perezida wa Repulika Paul Kagame mu ruhare agira mu guteza imbere imikino mu Rwanda.

Infantino yakomje avuga ko icyatumye bahitamo gushyira icyicaro cya FIFA i Kigali ari uko u Rwanda ari igihugu gifite iterambere ryihuta cyane mu bintu byose harimo n’umupira bakaba bizeye ko bizatuma n’akarere k’Afurika y’iburasizuba guteza imbere umupira w’amaguru.

Ati “U Rwanda na Kigali ni ahantu hadasanzwe. Nabibonye mu ijoro ryakeye, buri gihe uko nje mbona harushaho kuba heza kandi n’ibikorwa by’umupira w’amaguru bigenda bitera imbere."

Uretse mu Rwanda ahandi hari ibyicaro bya FIFA muri Afurika ni Johannesburg muri Afurika y’epfo na Dakar muri Sénégal. Nyuma y’Afrika ibindi bihugu birimo ibyicaro bya FIFA ni u Buhinde, Nouvelle Zelande, Panama, Paraguay. Barbados na Leta Zunze Ubumwe z’Abarabu.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO