Ikipe ya Barcelona yasinyanye amasezerano na Pierre-Emerick Aubameyang nyuma yo gusesa amasezerano yarafitanye na Arsenal.
Uyu munya-Gabon w’imyaka 32 akaba agiye gusinya amasezerano azageza tariki 30 Kamena 2025, ariko ashobora no kurangira tariki 30 Kamena 2023 nkuko impande zombi zabyumvikanyeho.
Aubameyang akaba ahagaze miliyoni 100 z’ama-euro (€100M) nkuko byashyizwe mu masezerano ye.
Uyu mukinnyi yavukiye Laval (Mayenne, France) tariki 19 Kamena 1989, akaba afite ubwenegihugu butatu harimo ubwa Esipanye, ubufaransa, na Gabon, gusa akaba yarahisemo gukinira ikipe y’igihugu ya Gabon.
Aubameyang yatangiye gukina umupira nk’uwabigize umwuga mu 2007 ubwo yerekezaga mu ikipe ya AC Milan avuye mu ngimbi za Bastia.
Icyo gihe yaje gutizwa muri Dijo (2008/09), muri 2009 yatijwe mu ikipe ya Lille, 2010 atizwa muri Monaco, mu mwaka wa 2011 yaje kugurwa na Saint-Etienne aza kuyivamo 2013 yerekeza muri Borussia Dortmund yakiniye kugeza 2018.
Kuva icyo gihe yakomereje muri Arsenal yari amazemo imyaka 4, ndetse yanayigiriyemo ibihe byiza, aho nko mu mwaka w’imikino wa 2019 yasoje ayoboye abatsinze ibitego byinshi muri Premier League, afite ibitego 22.
Muri 2015 kandi yahembwe nk’umukinnyi mwiza w’umunyafurika, naho 2016 agirwa umukinnyi mwiza w’umwaka muri Bundesliga.
Akaba amaze gukinira ikipe y’igihugu ya Gabon imikino 72, atsindamo ibitego 30.
Aubameyang yiyongereye kuri Adama Traore werekanwe uyu munsi, na Ferran Torres basinyiye FC Barcelona muri uyu mwaka wa 2022.
Pierre-Emerick Aubameyang ari gukorerwa ikizamini cy’ubuzima.
