Polisi ikomeje kugenzura ishyirwa mu bikorwa ry’amabwiriza yo kurwanya COVID-19

Hirya no hino mu gihugu Polisi y’u Rwanda ku bufatanye n’izindi nzego bakomeje ibikorwa byo kugenzura ko abaturarwanda barimo kubahariza amabwiriza ya Leta yo kurwanya ikwirakwira ry’icyorezo cya Coronavirus (COVID-19). Muri ayo mabwiriza harimo irisaba abantu kuguma mu ngo zabo, gusa hakomeje kugaragara abarenga kuri aya mabwiriza bagasohoka nyamara nta mpamvu zifatika bafite ndetse bamwe bakarwanya inzego.

Kuri uyu wa Kane tariki ya 27 Werurwe 2020 mu karere ka Rusizi mu murenge wa Mururu abaturage 12 barwanyije inzego z’umutekano n’abayobozi mu nzego z’ibanze ubwo babasaba gusubira mu ngo zabo.

Umuvugizi wa Polisi y’u Rwanda, Commissioner of Police (CP) John Bosco Kabera avuga ko ku mugoroba wa tariki 27 Werurwe abayobozi mu nzego z’ibanze ubwo bari mu gikorwa cyo gusaba abantu gusubira mu ngo zabo basanze itsinda ry’abasore 12 barwanya izo nzego.

Yagize ati: “Bariya basore bari biriwe bahagaze mu gasantere banze kujya mu ngo zabo baremye itsinda ryigometse, umuyobozi w’akagari ari kumwe na ba DASSO babasabye kujya mu ngo zabo barabyanga ahubwo batangira kubarwanya bakomeretsa umuyobozi w’akagari nibwo hitabajwe abapolisi.”

CP Kabera akomeza avuga ko urwo rubyiruko rwakomeje gutera amahane rushaka kurwana ndetse umwe muri bo wari umuyobozi w’iryo tsinda yarirutse bimuviramo gukomereka ikirenge, abandi barafashwe bashyikirizwa urwego rw’igihugu rushinzwe ubugenzacyaha (RIB).

Mu karere ka Ngororero abaturage babiri bafashwe barimo gucuruza inzoga mu gihe abandi Barindwi (7) bafatiwe mu mihanda barimo gukora ingendo zitari ngombwa.

Mu karere ka Ngoma mu mirenge ya Rukira na Karembo hafatiwe abaturage babiri bacuruzaga inzoga, abo baturage ndetse n’abanywaga izonga barafashwe.

Mu ntara y’Amajyaruguru mu karere ka Musanze mu murenge wa Gataraga hafatiwe abantu Batandatu (06) bari mu kabari barimo kunywa inzoga.

Mu mujyi wa Kigali naho mu bice bitandukanye hagiye hagaragara abantu barenze ku mabwiriza ya Leta yo gukumira ikwirakwira kw’icyorezo cya Coronavirus. Mu murenge wa Mageragere mu karere ka Nyarugenge hafatiwe abaturage Batandatu (06) mu ngo zabo bahahinduye utubari, abo bose bashyikirijwe ubuyobozi.

Muri aka karere nanone mu murenge wa Kimisaga hafatiwe abantu 110 harimo 90 bari mu mihanda bakora za ngendo zitari ngombwa, Icumi bafatiwe mu maresitora abandi 10 bafashwe bava mu tubari.

Mu karere ka Gasabo mu murenge wa Kinyinya hafatiwe abantu 45 harimo n’abacuruzaga inzoga ndetse n’abazinywaga. Mu murenge wa Gatsata na Gisozi hafatiwe abantu 14, bafatiwe mu tubari banywa inzoga.

Mu karere ka Kicukiro mu murenge wa Gahanga hafatiwe abantu Barindwi (07) nyiri akabari yaracitse ariko abarimo kunywa inzoga barafashwe. Mu murenge wa Nyarugunga hafatiwe abantu 10 nabo barimo kunywa inzoga mu kabari nyiri akabari aracika.

Umuvugizi wa Polisi y’u Rwanda, Commissioner of Police (CP) John Bosco Kabera avuga ko Polisi imaze iminsi inyura mu bice bitandukanye by’umujyi wa Kigali ikangurira abantu kuguma mu ngo zabo bakirinda ingendo zitari ngombwa ariko hakomeje kugaragara abarenga kuri ayo mabwiriza.

Yagize ati: “Benshi muri bariya bantu bafatirwaga mu tubari banywa inzoga abandi barimo kugenda ingendo zidafite impamvu. Kwigisha biracyakomeza ariko abatabyumva batangiye kubihanirwa.”

Tariki 22 Werurwe 2020 nibwo hatangiye iyubahirizwa ry’ibikubiye mu itangazo rya Minisitiri w’intebe rikubiyemo amabwiriza asaba abantu kuguma mu ngo zabo mugihe cy’ibyumweru Bibiri bishobora kongerwa, mu rwego rwo gukumira ikwirakwira ry’icyorezo cya Coronavirus.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO