Polisi yakomereje ubukangurambaga bwa Gerayo Amahoro muri ADEPR

Polisi yakomereye ubukangurambaga bwa Gerayo Amahoro no mu itorero rya ADEPR Remera, mu gikorwa kitabiriwe n’Umuvugizi wa Polisi y’u Rwanda Commissioner of Police(CP) John Bosco Kabera ndetse n’umuvugizi wa ADEPR Rev. Ephraim Karuranga.

Nyuma yaho mu cyumweru gishize Polisi y’u Rwanda yatangirije ubkangurambaga bwa Gerayo amahoro muri kiliziya gatolika, kuri ubu bwakomereje mu bagize impuzamatorero y’Abaporotesitanti mu Rwanda, bakiranye urugwiro iki gikorwa.

Kuri iki cyumweru tariki ya 19 Mutarama 2020 amatorero agize inama nkuru y’Abaporotesitanti mu Rwanda (CPR) yagejejweho ubutumwa bugamije gukangurira abayoboke bayo gukoresha neza umuhanda birinda impanaku.

Abayobozi batandukanye muri Polisi y’u Rwanda bashyikirije abayobozi n’abakristu b’amatorero y’abaporotesitanti mu Rwanda ubutumwa bwa Gerayo Amahoro bugamije gukangurira abaturarwanda gukumira no kwirinda impanuka.

Umuvugizi wa Polisi y’u Rwanda Commissioner of Police(CP) John Bosco Kabera wifatanyije n’abakirisitu bo mu itorero rya ADEPR Remera mu karere ka Gasabo yabasabye kwirinda uburangare igihe bakoresha umuhanda kuko butera ibyago byo gukora impanuka.

Yagize ati: "Ibintu 80% bitera impanuka byakwirindwa. Uburangare bw’abakoresha umuhanda nibwo bufite uruhare runini mu gutera impanuka, abakoresha umuhanda baramutse babwirinze impanuka zagabanuka ku buryo buri wese yaba yizeye ko nafata urugendo agera iyo ajya amahoro, akagaruka ayandi."

Umuvugizi w’itorere rya ADEPR mu Rwanda Rev Pasiteri Ephrem Karuranga yavuze ko bishimiye kwakira ubu butumwa kandi bazabwamamaza bukagera kuri buri wese usengera muri iri torero kandi bakamusaba kubuzirikana.

Yagize ati: "Ubu butumwa bwa Gerayo Amahoro Polisi yatugejejeho buradushimishije kandi tubijeje ko tuzabwamamaza bugakwira hose ku buryo abakirisitu bose bazabumenya kandi tukabasaba no kubwubahiriza.

Rev Pasiteri Karuranga yanasabye abakirisitu b’iri torero kwita ku bana babo babarinda icyabahungabanyiriza ubuzima cyaba impanuka cyangwa irindi hohohoterwa.

Ati: “Hari ababyeyi bohereza abana mu nyigisho zo ku cyumweru bakizana bonyine, ntibikwiye kuko bashobora gukinira mu muhanda imodoka zikabagonga cyangwa hakaba hari n’undi mugizi wa nabi wabahohotera baza cyangwa bava ku rusengero. Tugerageze tumenye aho abana bari n’uwo bari kumwe aho kubohereza ngo dutegereze ko bagaruka gusa.”

Polisi y’u Rwanda kandi yanagarutse ku bundi bukangurambaga bwitwa “Rengera Umwana” iteganya gutangiza mu minsi iri imbere bugamije gukumira no kurwanya ihohoterwa iryo ariryo ryose rikorerwa abana.

Abakirisitu b’itorero rya ADEPR basabwe kwita ku bana babo ndetse bakubahiriza uburengenzira bwabo kugira ngo bakomeze kugira imibereho myiza kuko ariyo izabafasha kubaka ejo hazaza habo n’ah’igihugu.

Ubu bukangurambaga bwatangijwe na Polisi y’igihugu muri Nyakanga 2019, hagamijwe gukangurira abakoresha umuhanda kwitwararika kuburyo yaba ugenda n’amaguru n’ugenda n’ikinyabiziga badashyira ubuzima bwabo mu kaga gaterwa n’impanuka zo mu muhanda.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO